Qazaqstan men Sıngapýr sý resýrstary men Orta dálizdi damytý boıynsha kelisimderge qol qoıdy
ASTANA. KAZINFORM — Qazaqstan Respýblıkasynyń Premer-mınıstri Oljas Bektenov Sıngapýrdyń aǵa mınıstri Lı Sıan Lýnmen kezdesý ótkizdi. Prezıdent Qasym-Jomart Toqaev pen Sıngapýrdyń aǵa mınıstri Lı Sıan Lýnnyń kelissózderi barysynda qol jetkizilgen ýaǵdalastyqtardy júzege asyrý máseleleri qaraldy. Bul týraly Úkimet málim etti.
Saýda-ekonomıkalyq jáne ınvestıtsııalyq yntymaqtastyqty damytý perspektıvalary talqylandy. Tsıfrlandyrý jáne jasandy ıntellektini engizý salasyndaǵy ózara is-qımylǵa, sondaı-aq bilim berý salasyndaǵy birlesken bastamalarǵa nazar aýdaryldy.
Kezdesýge qatysýshylar ekonomıkalyq áriptestiktiń oń dınamıkasyn atap ótti. Byltyr ekijaqty saýda kólemi $1 mlrd-qa jaqyndady, osy jyldyń alty aıynda taýar aınalymy $777 mln-ǵa jetip, ótken jyldyń sáıkes kezeńimen salystyrǵanda 2,5 esege ulǵaıdy. 2025 jyly Sıngapýrdan tartylǵan tikeleı sheteldik ınvestıtsııalardyń jalpy aǵyny eki esege artyp, shamamen $1,5 mlrd qurady.
Sonymen qatar, ekijaqty saýdany odan ári ártaraptandyrýdyń, ınvestıtsııalyq ózara is-qımyldy keńeıtýdiń jáne jańa birlesken jobalardy júzege asyrýdyń keń aýqymdy áleýeti aıqyndaldy. Yntymaqtastyq úshin perspektıvaly baǵyttardyń ishinde agroónerkásip jáne kólik-logıstıkalyq keshenderi, tsıfrlandyrý jáne jasandy ıntellekt salalary atap ótildi.
— Tsıfrlyq transformatsııa — Qazaqstannyń strategııalyq basymdyǵy. Osy jyldy Prezıdent Tsıfrlandyrý jáne jasandy ıntellekt jyly dep jarııalady. Bizdiń elimiz BUU-nyń onlaın-qyzmetter ındeksi boıynsha álemdik kóshbasshylardyń ondyǵyna kiredi. Búginde Qazaqstan aldaǵy úsh jyl ishinde jasandy ıntellektini keńinen engizý arqyly tolyq tsıfrlyq ekonomıkany qurý maqsatyn kózdeıtin damýdyń jańa kezeńine aıaq basty,— dep atap ótti Oljas Bektenov.
Lı Sıan Lýn eki eldiń úkimetteri bir-birimen jaqsy qarym-qatynasta jáne bızneske odan da kóp birlesken jobalardy júzege asyrýǵa múmkindik beretin seriktestik qurýǵa umtylyp otyrǵanyn atap ótti.
— Eki el ekonomıkasynda ınvestıtsııalar kólemi ulǵaıýda, qos memleket arasyndaǵy saýda kórsetkishteri ósýde, bul onyń kólemin arttyra túsý úshin negiz qalaıdy. Biz Qazaqstandaǵy ózgerister men ósý múmkindikterin kórip otyrmyz, bizdiń qarym-qatynasymyz odan ári alǵa jyljý úshin úlken áleýetke ıe, — dep atap ótti Lı Sıan Lýn.
Kezdesý qorytyndysy boıynsha saýda-ekonomıkalyq seriktestikti odan ári nyǵaıtýǵa jáne qol jetkizilgen ýaǵdalastyqtardy is júzinde júzege asyrýǵa daıyndyq rastaldy.
Kelesi qujattarǵa qol qoıyldy:
Sý resýrstary jáne ırrıgatsııa mınıstrligi men Singapore Cooperation Enterprise arasynda «Qalalyq sý resýrstary men qaldyqtardy ornyqty basqarý salasyndaǵy kóshbasshylyq» áleýetti arttyrý baǵdarlamasy boıynsha kelisim;
Middle Corridor Multimodal Ltd jáne Singapore Cooperation Enterprise arasynda mýltımodaldy tasymaldar, saýdaǵa járdemdesý jáne tsıfrlandyrý salalaryndaǵy ózara túsinistik jáne yntymaqtastyq týraly memorandým.
Kelisimder Sıngapýrdyń tájirıbesimen almasýdy, qazaqstandyq mamandardyń biliktiligin arttyrýdy, sondaı-aq kólik jáne saýda ekojúıelerin, sý resýrstaryn basqarýdyń zamanaýı tásilderin engizýdi, sonyń ishinde Orta dálizdiń áleýetin tolyq ashýǵa baǵyttalǵan sharalardy kózdeıdi.
Aıta keteıik, Sıngapýrdyń Aǵa mınıstri Lı Sıan Lýndy búgin Prezıdent Qasym-Jomart Toqaev Aqordada qabyldady.
