Qazaqstan men Sıngapýr Qyzmetterdiń erkin saýdasy jáne ınvestıtsııalar týraly kelisimge qol qoıdy
ASTANA. QazAqparat - Astanada Sıngapýr Prezıdenti Halıma ıAkobtyń memlekettik sapary aıasynda Qyzmetterdiń erkin saýdasy jáne ınvestıtsııalar týraly kelisimge qol qoıyldy. Qazaqstan úshin bul – osyndaı alǵashqy qujat.
Bul týraly QazAqparat Úkimettiń resmı saıtyna silteme «jasap habarlaıdy.
Kelisim qyzmetterdiń kishi sektorlarynyń 92 túri boıynsha ózara preferentsııalyq qoljetimdilikti belgileýdi, ınvestıtsııalardy júzege asyrý úshin neǵurlym qolaıly jaǵdaı jasaýdy kózdeıdi, sondaı-aq halyqaralyq tájirıbege sáıkes ınvestorlardy joǵary deńgeıde qorǵaýdy qamtamasyz etedi»,-delingen habarlamada.
Búgingi tańda Qazaqstan men Sıngapýr arasyndaǵy ekijaqty saýda belsendi túrde damyp keledi, 2022 jyldyń qorytyndysy boıynsha taýar aınalymy $1,9 mlrd boldy. Ótken jyly qyzmetter aınalymy $10,4 mln bolyp, al Sıngapýrdan Qazaqstanǵa quıylǵan tikeleı sheteldik ınvestıtsııalardyń jalpy aǵyny 2017-2021 jyldary 9,3%-ǵa 61,4-ten $67,2 mln-ǵa ósken.
Kelisimge qol qoıý eki eldiń saýda-ekonomıkalyq yntymaqtastyǵyn odan ári keńeıtýge, seriktes el naryǵyndaǵy otandyq qyzmetter eksportyn ulǵaıtýǵa, qyzmet kórsetý salasynda neǵurlym qolaıly jaǵdaı jasaýǵa jáne otandyq jetkizýshilerdiń básekege qabilettiligin arttyryp, ınvestıtsııalar aǵynyn ulǵaıtýǵa múmkindik beredi.
