Qazaqstan men Sıngapýr áýe qatynasyn keńeıtip, júk tasymalyn arttyrmaq
ASTANA. KAZINFORM – Qazaqstan men Sıngapýr azamattyq avıatsııa salasyndaǵy tehnıkalyq yntymaqtastyqty keńeıtý, áýe qatynasyn damytý jáne jolaýshylar men júk tasymaly kólemin arttyrý jóninde ýaǵdalasty, dep habarlaıdy Qazaqstannyń avıatsııalyq ákimshiligi.
Qazaqstannyń avıatsııalyq ákimshiligi (QAÁ) men Sıngapýrdyń Azamattyq avıatsııa basqarmasy (CAAS) Nıet týraly málimdemege qol qoıdy. Qujatqa QAÁ bas atqarýshy dırektory Maıkl Denıel men CAAS bas dırektory Han Kok Hýan qol qoıǵan.
Eki el Ortalyq Azııa men Ońtústik-Shyǵys Azııadaǵy mańyzdy avıatsııalyq habtar sanalady. Sońǵy jyldary Qazaqstan men Sıngapýr arasyndaǵy áýe qatynasy aıtarlyqtaı damyǵan.
Jańa kelisim aıasynda taraptar ushý qaýipsizdigi, avıatsııalyq qaýipsizdik, salanyń ornyqty damýy, ınnovatsııalar men jańa tehnologııalardy engizý baǵyttarynda yntymaqtastyq ornatýdy kózdep otyr.
Sondaı-aq avıatsııalyq ınspektorlardy daıarlaý, mamandardyń kásibı biliktiligin arttyrý jáne tájirıbe almasý jumystaryna basymdyq beriledi.
– CAAS-pen yntymaqtastyqty nyǵaıtý – avıatsııa mamandarymyzdyń kásibı quzyretterin odan ári arttyrý jolyndaǵy mańyzdy qadam. Biz táýekelge baǵdarlanǵan qadaǵalaý, ushý qaýipsizdigi men avıatsııalyq qaýipsizdik, sondaı-aq ınspektorlardy daıarlaý salalarynda tájirıbe jáne ozyq praktıkalarmen almasýdyń mańyzdylyǵyn joǵary baǵalaımyz, – dedi QAÁ bas atqarýshy dırektory Maıkl Denıel.
Onyń aıtýynsha, Qazaqstan mamandandyrylǵan oqytý men kásibı damý múmkindikterin keńeıtip, qaýipsiz ári tıimdi azamattyq avıatsııa júıesin qalyptastyrýǵa múddeli.
Bul qujat 2024 jyly jasalǵan oqytý salasyndaǵy yntymaqtastyq týraly kelisimniń aıasyn keńeıtedi. Buǵan deıin eki eldiń áriptestigi negizinen Qazaqstanda avıatsııalyq daıarlaý baǵdarlamalaryn iske asyrýmen shektelgen.
Taraptar 2027 jyldyń birinshi jartysynda jańa Ózara túsinistik týraly memorandýmǵa qol qoıýdy josparlap otyr. Qujat CAAS delegatsııasynyń Qazaqstanǵa sapary kezinde rásimdelýi múmkin.
Jańa memorandým aıasynda eki eldiń avıatsııalyq vedomstvolary basshylarynyń jyl saıynǵy kezdesýlerin ótkizý kózdelgen. Olar Qazaqstan men Sıngapýrda kezekpen uıymdastyrylady.
– Nıet týraly málimdemege qol qoıý azamattyq avıatsııa salasyndaǵy eki organnyń tehnıkalyq yntymaqtastyqty tereńdetýge, elderimiz ben óńirlerimiz arasyndaǵy baılanysty nyǵaıtýǵa, mamandar arasyndaǵy ózara is-qımyl men iskerlik baılanystardy jandandyrýǵa jáne jańa ekonomıkalyq múmkindikter ashýǵa degen ortaq ustanymyn kórsetedi, – dedi CAAS bas dırektory Han Kok Hýan.
Onyń sózinshe, jyl saıynǵy resmı kezdesýler eki eldiń avıatsııa salasyndaǵy áriptestigin turaqty negizde damytýǵa múmkindik beredi.
Aıta keteıik, buǵan deıin sıngapýrlyq Changi Airport Group kompanııasy Astanany óńirlik avıatsııalyq habqa aınaldyrýǵa atsalysýǵa daıyn ekenin málimdegen edi. Kompanııa Qazaqstandaǵy áýejaı ınfraqurylymyn damytýǵa óz tájirıbesi men tehnologııalaryn usynýǵa múddeli.
