Qazaqstan men Sıngapýr arasyndaǵy saýda aınalymy 954,4 mln dollarǵa jetti
ASTANA. KAZINFORM — Astana men Sıngapýr ekijaqty yntymaqtastyqty odan ári tereńdetý perspektıvalaryn talqylady, dep habarlaıdy QR SІM baspasóz qyzmeti.
Syrtqy ister mınıstrliginde mınıstrdiń orynbasary Álibek Baqaev pen Sıngapýr Respýblıkasy Syrtqy ister mınıstrliginiń Turaqty hatshysynyń orynbasary Kevın Cheoktyń qatysýymen Qazaqstan-Sıngapýr saıası konsýltatsııalarynyń besinshi raýndy ótti.
Konsýltatsııalar barysynda Qazaqstan men Sıngapýr arasyndaǵy ózara is-qımyldyń qazirgi jaı-kúıi men damý perspektıvalary jóninde mazmundy pikir almasý ótkizildi. Saıası dıalogty odan ári nyǵaıtýǵa, sharttyq-quqyqtyq bazany keńeıtýge jáne joǵary ári bıik deńgeıdegi baılanystardy jandandyrýǵa ózara umtylys rastaldy.
— Saýda-ekonomıkalyq jáne ınvestıtsııalyq yntymaqtastyqty keńeıtýge basym nazar aýdaryldy. 2025 jyldyń qorytyndysy boıynsha ózara saýda kólemi 954,4 mln AQSh dollaryna jetip, ornyqty oń serpin kórsetkeni atap ótildi. Qarjy salasynda, tsıfrlandyrýda, «aqyldy» qalalardy damytýda, jasyl ekonomıkada, kólik-logıstıkalyq ınfraqurylymda, sondaı-aq bilim berý men ınnovatsııalar salasynda seriktestikti tereńdetýdiń aıtarlyqtaı áleýeti bar ekeni atap ótildi, — delingen habarlamada.
Álibek Baqaev sıngapýrlyq bızneske eýropalyq jáne jahandyq naryqtarǵa shyǵý úshin qaýipsiz, tıimdi ári kommertsııalyq turǵydan tartymdy baǵyttardy qamtamasyz ete alatyn Qazaqstannyń tranzıttik-logıstıkalyq áleýetiniń erekshe mańyzdylyǵyn atap ótti.
Sonymen qatar halyqaralyq jáne óńirlik kún tártibiniń ózekti máseleleri, sondaı-aq BUU men Ońtústik-Shyǵys Azııa memleketteri qaýymdastyǵy (ASEAN) aıasyndaǵy ózara is-qımyl boıynsha pikir almasý ótti.
Kelissózder qorytyndysy boıynsha turaqty saıası dıalogty jalǵastyrýǵa jáne ekijaqty yntymaqtastyqty odan ári serpindi damytýǵa ózara daıyndyq rastaldy.
Osydan buryn Qazaqstan–Sıngapýr tikeleı áýe qatynasyn ashý múmkindigin qarastyryp jatqanyn jazǵanbyz.
