Qazaqstan men Shveıtsarııa sý dıplomatııasyn damytady
ASTANA. KAZINFORM — Sý resýrstary jáne ırrıgatsııa mınıstri Nurjan Nurjigitov Shveıtsarııanyń Qazaqstandaǵy Tótenshe jáne ókiletti elshisi Krıstına Honeggermen kezdesti.
Kezdesýde ekijaqty yntymaqtastyqty odan ári damytýdyń yqtımal baǵyttary, sondaı-aq Shveıtsarııa tarapynyń qoldaýymen júzege asyrylyp jatqan «Blue Peace Central Asia» (BPCA) óńirlik baǵdarlamasynyń barysy qaraldy.
Shveıtsarııanyń Damý jáne yntymaqtastyq agenttigi (SDC) bastamashy bolǵan joba úsh strategııalyq baǵytty qamtıdy. Olar - sý dıplomatııasy, basseındik josparlaý, sondaı-aq ǵylymı jáne kadrlyq áleýetti arttyrý.
Nurjan Nurjigitov Ortalyq Azııa elderi arasynda sý resýrstaryn basqarý máseleleri boıynsha senimdi nyǵaıtýǵa, dıalog pen yntymaqtastyqty damytýǵa baǵyttalǵan BPCA baǵdarlamasynyń mańyzyn atap ótti.
Taraptar sondaı-aq qazaqstandyq beıindi uıymdar men mamandardyń sý resýrstaryn basqarýdyń ınnovatsııalyq tehnologııalaryn engizý, jerústi sýyna monıtorıng júrgizý jáne olardy esepke alý júıelerin damytý, sý resýrstaryn paıdalaný tıimdiligin arttyrý, sondaı-aq sý sharýashylyǵy salasy mamandarynyń áleýetin nyǵaıtý jónindegi birlesken jobalarǵa qatysý múmkindigin talqylady.
- Shveıtsarııamen áriptestikti jalǵastyrý óńirlik yntymaqtastyqty nyǵaıtýǵa jáne sý resýrstaryn turaqty basqarý salasyndaǵy praktıkalyq sheshimderdi ilgeriletýge yqpal etetinine senimdimiz. Qazaqstan tek qoldanystaǵy óńirlik baǵdarlamalar aıasynda ǵana emes, sonymen qatar jańa birlesken bastamalardy iske asyrý arqyly da ózara is-qımyldy keńeıtýge múddeli. Atap aıtqanda, sý sharýashylyǵyn tsıfrlandyrý jáne gıdrotehnıkalyq qurylystardy paıdalaný tıimdiligin arttyrý baǵyttaryndaǵy yntymaqtastyqty damytý perspektıvaly dep sanaımyz, - dedi Sý resýrstary jáne ırrıgatsııa mınıstri Nurjan Nurjigitov.
Aıta keteıik, 2026 jylǵy 1 sáýirden bastap Qazaqstannyń sý sharýashylyǵy qyzmetkerleriniń eńbekaqysy taǵy 15%-ǵa artty.