Qazaqstan men Shveıtsarııa kólik, farmatsevtıka jáne ekologııa salasyndaǵy baılanysty kúsheıtpek
ASTANA. KAZINFORM — Qazaqstan Respýblıkasy Syrtqy ister mınıstriniń orynbasary Arman Isetov Shveıtsarııa Konfederatsııasynyń Qazaqstan Respýblıkasyndaǵy Ýaqytsha senimdi ókili Djordjo Pompılıomen Astanadaǵy dıplomatııalyq mıssııasynyń aıaqtalýyna baılanysty kezdesti. Bul týraly SІM málim etti.
Kezdesý barysynda taraptar qazaq-shveıtsar yntymaqtastyǵynyń ózekti máselelerin, sondaı-aq ony odan ári damytý perspektıvalaryn talqylady. «Blue Peace Central Asia» (BPCA) bastamasy aıasyndaǵy sý jáne ekologııa salalaryndaǵy ózara is-qımylǵa erekshe nazar aýdaryldy. Kólik, farmatsevtıka jáne ekologııa salalaryndaǵy praktıkalyq áriptestikti turaqty damytý mańyzdylyǵy atalyp ótti.
Kezdesý sońynda A. Isetov D. Pompılıoǵa ekijaqty baılanystardy nyǵaıtýǵa qosqan úlesi úshin alǵys aıtyp, aldaǵy dıplomatııalyq qyzmetine tabys tiledi.
Aıta keteıik, buǵan deıin Qazaqstanda 300-ge jýyq shveıtsarııalyq kompanııa jumys isteıtinin jazdyq.
