Qazaqstan men Shveıtsarııa $1,6 mlrd bolatyn birlesken jobalardy iske asyrýǵa nıetti
ASTANA. KAZINFORM — Premer-mınıstr Oljas Bektenov pen Shveıtsarııanyń vıtse-prezıdenti Gı Parmelan saýda-ekonomıkalyq yntymaqtastyq máselesin talqylady. Bul týraly Úkimettiń baspasóz qyzmeti habarlady.
Úkimet úıi ǵımaratynda Qazaqstan Respýblıkasynyń Premer-mınıstri Oljas Bektenov Shveıtsarııanyń vıtse-prezıdenti Gı Parmelanmen kezdesti.
Delegatsııalar Qazaqstan Prezıdenti Qasym-Jomart Toqaevpen kelissózder qorytyndysy boıynsha qol jetkizilgen ýaǵdalastyqtar sheńberinde saýda-ekonomıkalyq qatynastardy damytý máselelerin talqylandy.
Investıtsııalyq baılanystardy keńeıtýge, ónerkásiptegi, aýyl sharýashylyǵyndaǵy, energetıkadaǵy, tsıfrlyq, kólik-logıstıkalyq, sý salalaryndaǵy jáne taǵy da basqa ózara is-qımylǵa nazar aýdaryldy.
Shveıtsarııa — Qazaqstannyń turaqty ekonomıkalyq seriktesi jáne ekijaqty saýda kólemi boıynsha 15 jetekshi eldiń qataryna kiredi. Osy jyldyń 9 aıynda bul kórsetkish shamamen $1,1 mlrd-qa jetti. Byltyr ózara taýar aınalymy 26,2%-ǵa ulǵaıyp, $1,7 mlrd-tan asqan bolatyn. Qazaqstandyq ónim eksporty 30,6%-ǵa ósti.
Taraptar ınvestıtsııalyq yntymaqtastyqty damytýǵa arnalǵan perspektıvti baǵyttarǵa da toqtaldy. 2025 jyldyń birinshi jartyjyldyǵynda Shveıtsarııadan Qazaqstanǵa tartylǵan tikeleı ınvestıtsııa kólemi 34,2%-ǵa ulǵaıyp, $568 mln boldy.
Kólik-logıstıka salasynda halyqaralyq marshrýttardy, teńiz porttaryn, logıstıkalyq ortalyqtardy jáne eksporttyq-logıstıkalyq óndiristerdi damytý boıynsha yntymaqtastyq áleýeti talqylandy. Sátti mysal retinde Stadler Kazakhstan jolaýshylar vagondaryn shyǵarý jobasy keltirildi. Qazaqstannyń avıahabtardy damytý boıynsha júrgizip jatqan jumystary sheńberinde avıatsııa salasyndaǵy perspektıvalar atap ótildi.
Negizgi baǵyt bolyp ónerkásiptik kooperatsııa qala beredi. Birlesken jobalar pýly shamamen 3,3 myń jumys ornyn ashýǵa múmkindik beretin $1,6 mlrd-tyq birqatar iri jobany qamtıdy. Ónerkásip salasyndaǵy tehnologııalar transferi aıtarlyqtaı áleýetke ıe.
IT-tehnologııalar salasynda Qazaqstannyń tsıfrlyq kún tártibimen sáıkes keletin ortaq múddeler belgilendi. Yntymaqtastyqtyń áleýetti baǵyttary medıtsınaǵa, ónerkásipke, «aqyldy» qalalardyń tsıfrlyq ınfraqurylymyna jáne taǵy da basqa salalarǵa JI-sheshimderdi engizý máselesin qamtıdy.
Aýyl sharýashylyǵy salasynda irimshik pen basqa da premıým-klasty sút taǵamdaryn óndirý úshin sút ónimderin qaıta óńdeý salasynda shveıtsarııalyq ozyq tehnologııalardy paıdalana otyryp, birlesken kásiporyndar qurý perspektıvalary atap ótildi.
Sondaı-aq sý resýrstaryn basqarý salasyndaǵy áriptestik máseleleri talqylandy. Olardy utymdy paıdalanýǵa jáne ozyq ınjenerlik sheshimderdi engizýge basa nazar aýdaryldy.
Qarjy, áleýmet jáne energetıka salalaryndaǵy, sondaı-aq ShOB-ty qoldaý boıynsha ózara is-qımyldy keńeıtýge qatysty usynystarmen Economiesuisse syrtqy ekonomıkalyq baılanystar jónindegi shveıtsarııalyq kásiporyndar qaýymdastyǵynyń prezıdenti Krıstof Meder, SWISSMEM kompanııasynyń bas dırektory Shtefan Brýpbaher, shveıtsarııalyq eksporttyq táýekelderdi saqtandyrý (SERV) dırektorlar keńesiniń tóraǵasy Barbara Haıo, Switzerland Global Enterprise bas dırektorynyń orynbasary Anıa Fıdler, Stadler Rail AG dırektorlar keńesiniń tóraǵasy Peter Shpýler, Birikken saýda palatasynyń (JCC) prezıdenti Marsel Pavlıchek, Shveıtsarııa Konfederatsııasy Ulttyq keńesiniń múshesi jáne Qazaqstan-Shveıtsarııa parlamenttik dostyq tobynyń múshesi Roland Rıno Bıýhel jáne Shveıtsarııa Konfederatsııasy ekonomıkasynyń memlekettik hatshylyǵynyń Eýropa jáne Ortalyq Azııamen ekijaqty yntymaqtastyq bóliminiń keńesshisi Iohen ıAnsen sóz sóıledi.
Qazaqstan tarapynan Premer-mınıstrdiń orynbasary — jasandy ıntellekt jáne tsıfrlyq damý mınıstri Jaslan Mádıev, kólik mınıstri Nurlan Saýranbaev, ónerkásip jáne qurylys mınıstri Ersaıyn Naǵaspaev, sondaı-aq «Atameken» UKP tóralqa tóraǵasy Raıymbek Batalov sóz sóıledi.
Kezdesý qorytyndysy boıynsha taraptar yntymaqtastyqty is júzinde keńeıtýge jáne ekijaqty qatynastardy odan ári tereńdetýge beıil ekendikterin rastady.
Aıta ketelik Memleket basshysy Shveıtsarııa vıtse-prezıdenti Gı Parmelanmen kelissóz júrgizgen edi.