Qazaqstan men Shveıtsarııa arasyndaǵy taýar aınalymy 5 mlrd. 181 mln. dollardan asty
ASTANA. 8 qańtar. QazAqparat - Qazaqstan men Shveıtsarııa arasyndaǵy taýar aınalymy 5 mlrd. 181 mln. dollardan asyp otyr.
Bul týraly búgin Parlament Májilisiniń jalpy otyrysynda málim boldy. Eske salsaq, jıyn barysynda Qazaqstan Respýblıkasynyń Úkimeti men Shveıtsarııa Federaldyq Keńesi arasyndaǵy salyq salý máselelerin qamtıtyn Hattama maquldanǵan edi.
QR Qarjy vıtse-mınıstri Rýslan Dálenovtyń aıtýynsha, Qazaqstanǵa Shveıtsarııa eksporty 4 mlrd. 900 mln. dollardy, ımport 215 mln. dollarǵa jetken. «Qazaqstan eksportynyń negizgi baǵyttary mıneraldyq shıkizat bolsa, ımport qurylymynda hımııa jáne mashına jasaý salasynyń jabdyqtary qamtylyp otyr. Shveıtsarııa kompanııalarynyń qatysýymen Qazaqstanda 163 kásiporyn jáne 60 fılıaly men ókildikteri jumys isteıdi», - deıdi R. Dálenov.
Toqtala ketetin jaıt, Qazaqstan úshin Shveıtsarııa úlken mánge ıe. Óıtkeni, bútkil Eýropa boıynsha taýar aınalymynyń 60 paıyzy osy elge tıesili. Shveıtsarııa úshin de Qazaqstan erekshe oryn alady, bul elde saýda-sattyq Reseıden keıingi ekinshi orynda tur.
«Jalpy hattama Qazaqstan men Shveıtsarııa arasyndaǵy salyq qyzmetiniń yntymaqtastyǵyn keńeıte túsedi. 2012 jyldyń qorytyndysy boıynsha Shveıtsarııa syrtqy saýda seriktestigi retinde 8-i orynda tur. Sonymen qatar, 2008 jylǵa qaraǵanda 2009 jyly taýar aınalymy 11,5 mlrd. dollardan 2,8 mlrd. dollarǵa kúrt tómendese, ótken jyldyń qorytyndysy boıynsha 5 mlrd. dollarǵa ósip otyr. Bul málimet eki el arasyndaǵy ekonomıkalyq baılanystar áli de bolsa turaqty túrge ıe emes ekenin kórsetedi», - deıdi depýtat Shavhat Ótemisov.
