Qazaqstan men Shveıtsarııa arasynda zergerlik zattar eksportynyń talaptary jeńildeıdi

ASTANA. QazAqparat – Májilistiń jalpy otyrysynda «Qazaqstan Respýblıkasynyń Úkimeti men Shveıtsarııa Konfederatsııasynyń Federaldyq Keńesi arasyndaǵy baǵaly metaldardan jasalǵan buıymdardaǵy cynamalyq tańbany ózara taný jónindegi kelisimdi ratıfıkatsııalaý týraly» zań jobasy maquldandy, dep habarlaıdy QazAqparat tilshisi.

Kelisim Qazaqstan Respýblıkasy men Shveıtsarııa Konfederatsııasy arasynda baǵaly metaldardan jasalǵan zattardyń saýdasyn damytýǵa, sondaı-aq metaldyń quramyn qaıta tekserý jáne qosarlanǵan tańbalaý rásimin ońtaılandyrýǵa yqpal etedi.

«Qazirgi kezde Qazaqstan zańnamasyna sáıkes zergerlik zattar mindetti túrde elimizdiń tańbasymen belgilenedi. Degenmen, búkil álemde tanylǵan Shveıtsarııadaǵy zergerlik zattardyń sapasyn nazarǵa ala otyryp, Qazaqstan jaǵy qaıta tańbalaýdy júrgizbeıtin bolady. Ózara qarym-qatynas qaǵıdaty boıynsha Qazaqstannan Shveıtsarııaǵa áketiletin zergerlik zattar da tańbalaýǵa jatpaıdy. Kelisimdi qabyldaý zergerlik zattardy qaıda tańbalaýdy qajet etpeıdi», - dedi QR Saýda jáne ıntegratsııa birinshi vıtse-mınıstri Arman Shakqalıev.

Onyń aıtýynsha, atalǵan qadamdardy eskere otyryp, zergerlik zattardy eksporttaý kezinde ákimshilik júktemeni azaıtýǵa múmkindik beredi.

«Belgilengen rásimderdi jeńildetý eksporttyń ósýine janama áser etýi múmkin. Atap aıtqanda, Shveıtsarııa jaǵy osyndaı kelisimderdi Reseı Federatsııasymen, Frantsııamen, Italııamen, Avstrııamen, Ispanııamen jasady. Kelisimde zańnamanyń barlyq talaptary eskerilgen. Ony ratıfıkatsııalaý Qazaqstan Respýblıkasynyń zańdaryna ózgeris engizýge alyp kelmeıdi», - dedi A. Shakqalıev.

Foto: img.youm7.com