Qazaqstan men Shvetsııa júk tehnıkasyn birlesip óndirý týraly memorandýmǵa qol qoıdy
ASTANA. KAZINFORM - Astanada eki eldiń memlekettik organdary, damý ınstıtýttary men bıznes-qurylymdary ókilderiniń qatysýymen Qazaq-shved saýda-ekonomıkalyq jáne ınvestıtsııalyq yntymaqtastyq jónindegi ekijaqty komıssııasynyń otyrysy ótti, dep habarlaıdy QR Ónerkásip jáne qurylys mınıstrliginiń baspasóz qyzmeti.
Jıynda taraptar ekijaqty yntymaqtastyqtyń, onyń ishinde ınvestıtsııalar, ónerkásip kooperatsııasy, mashına jasaý, TMK, asa mańyzdy mıneraldar jáne basqa da baǵyttar boıynsha aýqymdy máselelerdi talqylady.
Otyrys barysynda Qazaqstanda Volvo júk avtomobılderin óndirýge daıyndyqty kózdeıtin Astana Motors jáne Volvo Group arasyndaǵy yntymaqtastyq týraly memorandýmǵa qol qoıyldy.
Jobanyń bastapqy kezeńinde alys qashyqtyqqa tasymaldaýǵa arnalǵan Volvo FH13 magıstraldy tartqyshtaryn shyǵarý josparlanyp otyr. Sonymen qatar ónerkásip pen qurylysta keńinen qoldanylatyn Volvo FMX13 avtokólikterin óndirý múmkindigi qarastyrylý ústinde.
Shved avtomobıl kompanııasy – keńeıtilgen modeldi júk kólikterin shyǵaratyn álemdegi kóshbasshy óndirýshilerdiń biri. Ótken jyly Volvo Trucks Qazaqstanda alǵashqy servıstik stansasyn jáne Ortalyq Azııa men Kavkaz óńiri úshin jańa keńse ashty. Birlesken óndiris alańyn iske qosý otandyq avtomobıl salasynyń áleýetin nyǵaıtyp, Qazaqstan men Shvetsııa arasyndaǵy ónerkásiptik yntymaqtastyqty jańa deńgeıge kóteredi.
Osyǵan deıin 2026-2028 jyldary taý-ken metallýrgııa kesheni aýqymdy tsıfrlyq transformatsııadan óteini týraly jazdyq.
