Qazaqstan men Shvetsııa saýda-ekonomıkalyq komıssııa qurdy
ASTANA. KAZINFORM — Qazaqstan men Shvetsııa saýda-ekonomıkalyq jáne ınvestıtsııalyq yntymaqtastyq jónindegi ekijaqty komıssııa qurý týraly kelisimge keldi, dep habarlaıdy Ónerkásip jáne qurylys mınıstrliginiń baspasóz qyzmeti.
Ónerkásip jáne qurylys mınıstri Ersaıyn Naǵaspaev Astana Mining & Metallurgy halyqaralyq taý-ken metallýrgııa kongresine qatysý úshin Astanaǵa kelgen Shvetsııa Koroldigi Syrtqy ister mınıstrliginiń saýda jónindegi memlekettik hatshysy Dıana ıAnsemen kezdesti.
Kezdesý aıasynda Qazaqstan Respýblıkasy Ónerkásip jáne qurylys mınıstrligi men Shvetsııa Syrtqy ister mınıstrligi arasynda Qazaqstan-Shvetsııa saýda-ekonomıkalyq jáne ınvestıtsııalyq yntymaqtastyq jónindegi alǵashqy ekijaqty komıssııany qurýdy kózdeıtin ózara túsinistik týraly memorandýmǵa qol qoıyldy. Qujat eki eldiń memlekettik organdary, isker toptary, qarjy uıymdary jáne ǵylymı-zertteý ınstıtýttary arasyndaǵy ózara is-qımyldy nyǵaıtýǵa baǵyttalǵan.
— Qazaqstan úshin Shvetsııa ónerkásip pen tehnologııa salasyndaǵy eń perspektıvaly seriktesterdiń biri. Bizde yntymaqtastyqtyń tabysty úlgileri bar. Endi osy ońtaıly qadamdardy aýqymdy, júıeli ári naqty jobalarǵa negizdelgen áriptestikke ulastyrý mańyzdy. Biz Qazaqstandaǵy qyzmet aıasyn keńeıtýge múddeli shved kompanııalaryna jan-jaqty qoldaý kórsetýge daıynbyz, — dep atap kórsetti Ersaıyn Naǵaspaev.
Óz kezeginde Shvetsııa Koroldigi Syrtqy ister mınıstrliginiń saýda jónindegi memlekettik hatshysy Dıana ıAnse shved bıznesiniń elimizdegi qolaıly ınvestıtsııalyq ahýalǵa baılanysty qazaqstandyq naryqqa qyzyǵýshylyǵy joǵary ekenin atap ótti.
Endi taraptar arasyndaǵy dıalog Qazaqstan-Shvetsııa saýda-ekonomıkalyq jáne ınvestıtsııalyq yntymaqtastyq jónindegi ekijaqty komıssııanyń otyrysynda jalǵasatyn bolady.
Buǵan deıin Naǵaspaev ındýstrııalyq alańdardy basqarýdyń jańa tetikteri ázirlenetinin málimdedi.
