Qazaqstan men Shyǵanaq elderi aımaqtyq qaýipsizdik pen yntymaqtastyqty talqylady
ASTANA. KAZINFORM — QR Syrtqy ister mınıstri Shyǵanaq elderiniń jáne Iordanııanyń elshilerin qabyldady, dep habarlaıdy vedomstvonyń baspasóz qyzmeti.
Qazaqstan Respýblıkasynyń Syrtqy ister mınıstri Ermek Kósherbaevtyń Shyǵanaqtaǵy arab elderiniń jáne Iordanııanyń elshilerimen kezdesýi ótti. Kezdesý barysynda taraptar Taıaý Shyǵystaǵy qazirgi ahýaldy talqylap, óńirdegi shıelenis tóńireginde pikir almasty.
SІM basshysy eskalatsııanyń jalǵasýyna, onyń ishinde dostas arab elderine jasalǵan soqqylarǵa baılanysty eleýli alańdaýshylyq tanytty.
Ol aımaqtaǵy beıbit turǵyndardyń qaza tabýyna jáne azamattyq ınfraqurylymǵa aıtarlyqtaı zııan keltirip jatqan barlyq soǵys qımyldaryn tez arada toqtatýdyń mańyzdylyǵyn atap ótti. Osyǵan baılanysty qazaqstandyq dıplomat mıssııa basshylaryna QR azamattaryn evakýatsııalaýǵa jáne olardyń elimizge aman-esen oralýyna járdem úshin alǵys bildirdi.
— Mınıstr Qazaqstan tarapy Shyǵanaq elderi kóshbasshylarynyń beıbit saıası dıalog ornatý jónindegi kúsh-jigerin, sondaı-aq Qytaı men Pákistannyń aımaqtaǵy beıbitshilik pen turaqtylyqty qalpyna keltirýge baǵyttalǵan birlesken bastamasyn quptaıtynyn aıtty. Sonymen qatar, ol Qazaqstannyń Túrkistan qalasynda beıbit kelissózder úshin alań usynýǵa daıyn ekenine nazar aýdardy, — delingen habarlamada.
Óz kezeginde arab dıplomattary aımaqtyq qaýipsizdikti qamtamasyz etý boıynsha halyqaralyq kúsh-jigerdiń, sonyń ishinde Astanamen baılanystar men úılestirýdi odan ári nyǵaıtýdyń mańyzdylyǵyn jetkizdi. Olar saıası dıalogty nyǵaıtý, jan-jaqty yntymaqtastyqty keńeıtý jáne birlesken jobalardy júzege asyrý úshin tyǵyz ózara is-qımyldy jalǵastyrýǵa daıyn ekendikterin rastady.
Osyǵan deıin Kósherbaev Ortalyq Azııa elderi men Ázerbaıjannyń syrtqy ister mınıstrlerimen ne týraly sóıleskenin jazǵanbyz.
