Qazaqstan men Shell geologııalyq derekterdi tsıfrlandyrý boıynsha memorandýmǵa qol qoıdy
ASTANA. KAZINFORM - Qazaqstanda jer qoınaýyn zertteý jańa tehnologııalyq deńgeıge kóterilip keledi. Búgin Energetıka mınıstrligi, «Ulttyq geologııalyq qyzmet» AQ jáne «Shell Qazaqstan» kompanııasy kómirsýtek shıkizatyn geologııalyq barlaý salasyndaǵy yntymaqtastyq týraly memorandýmǵa qol qoıdy.
QR Energetıka mınıstrligi baspasóz qyzmetiniń habarlaýynsha, seriktestiktiń negizgi baǵyty – álemdik ozyq tájirıbemen almasý jáne kómirsýtek shıkizaty boıynsha geologııalyq arhıvterdi tsıfrlandyrý.
Qujat mamandardy birlesip oqytýǵa jáne jer qoınaýyn keshendi taldaýǵa arnalǵan turaqty alań qalyptastyrady.
Memorandýmnyń praktıkalyq ózegine zamanaýı geoaqparattyq júıeni ázirleý jónindegi pılottyq jobany iske asyrý kiredi. Bul tsıfrlyq platforma jınaqtalǵan tarıhı geologııalyq derekterdi tereń óńdeýge jáne ınterpretatsııalaýǵa múmkindik beredi.
Tsıfrlandyrý respýblıkanyń resýrstyq áleýetin tereńirek túsinýge jol ashyp, salanyń ınvestıtsııalyq tartymdylyǵyn arttyrady dep kútilip otyr.
-Memorandýmǵa qol qoıý memlekettik organdar, ulttyq ınstıtýttar jáne halyqaralyq seriktester arasyndaǵy yntymaqtastyqty nyǵaıtýda mańyzdy qadam bolyp tabylady. Qazaqstan úshin geologııalyq barlaý jumystarynyń tıimdiligin arttyrý, onyń ishinde tsıfrlyq tehnologııalar men geologııalyq derektermen jumys isteýdiń zamanaýı tásilderin belsendi engizý basymdyqtardyń biri bolyp sanalady. Bilimdi, tájirıbeni jáne tehnologııalyq sheshimderdi biriktirý elimizdiń resýrstyq áleýetin tıimdirek ashýǵa jáne salanyń júıeli damýyn qamtamasyz etýge múmkindik beredi, – dep atap ótti Energetıka vıtse-mınıstri Erlan Aqbarov.
Óz kezeginde elimizdiń geologııalyq derekter qorynyń operatory tehnologııalyq ıntegratsııanyń mańyzdylyǵyn atap ótti.
- Ulttyq geologııalyq qyzmet Qazaqstannyń ashyq ári zamanaýı geologııalyq platformasyn dáıekti túrde damytýda. Shell sekildi halyqaralyq seriktestermen ózara is-qımyl kómirsýtek shıkizaty boıynsha geologııalyq derekterdiń taldamalyq jáne ınterpretatsııalyq bazasyn kúsheıtip, jer qoınaýyn paıdalaný salasynda qabyldanatyn sheshimderdiń sapasyn arttyrýǵa múmkindik beredi, – dedi «Ulttyq geologııalyq qyzmet» AQ Basqarma tóraǵasy Erlan Ǵalıev.
Sheteldik kontsern ókilderi de qazaqstandyq óndirýshi salaǵa jahandyq ІT-quraldardy engizý bastamasyn joǵary baǵalady.
- Memorandýmǵa qol qoıý, onyń ishinde tarıhı geologııalyq derekterdi óńdeý men ınterpretatsııalaýǵa arnalǵan tsıfrlyq platformany ázirleý jónindegi pılottyq jobany josparlaý Shell kompanııasynyń Qazaqstan Respýblıkasymen uzaq merzimdi yntymaqtastyqqa beıildiligin rastaıdy. Biz Qazaqstannyń ekonomıkany tsıfrlandyrý jónindegi strategııalyq basymdyǵyn qoldaımyz jáne ozyq tehnologııalar men kompanııamyzdyń jahandyq tájirıbesin paıdalaný kómirsýtek shıkizatyn geologııalyq barlaý tıimdiligin arttyrýǵa óz úlesin qosady dep esepteımiz, – dep pikir bildirdi Shell kontserniniń Qazaqstandaǵy aǵa vıtse-prezıdenti jáne tóraǵasy Sıýzann Kýgan.
Aıta keteıik, osyǵan deıin Energetıka mınıstri Erlan Aqkenjenov Bakýde ótken BEW 2026 halyqaralyq energetıkalyq forýmy aıasynda Túrkııa Respýblıkasynyń Energetıka jáne tabıǵı resýrstar mınıstri Alparslan Baıraktarmen kezdesý ótkizdi.
Taraptar munaı-gaz, elektr energetıkasy jáne jańartylatyn energııa kózderi salalaryndaǵy yntymaqtastyqty keńeıtý perspektıvalaryn talqylady.
