Qazaqstan men Serbııanyń álemdegi kóptegen túıtkilge qatysty ustanymy uqsas — Toqaev
ASTANA. KAZINFORM — Qazaqstan men Serbııanyń álemdegi kóptegen túıtkilge qatysty ustanymy uqsas. Bul týraly Aqordada Serbııa Prezıdenti Aleksandr Výchıchpen kelissózderden keıingi BAQ ókilderine arnalǵan birlesken málimdeme barysynda Memlket basshysy Qasym-Jomart Toqaev aıtty.
— Jalpy, búgingi kelissózder óte tabysty boldy. Birlesken málimdeme qabyldadyq. Jan-jaqty yntymaqtastyqqa tyń serpin beretin birqatar mańyzdy qujatqa qol qoıdyq. Osy kelisimderdiń nátıjesinde eki eldiń qarym-qatynasy nyǵaıa túsetini sózsiz. Prezıdent Výchıch myrzamen halyqaralyq jáne aımaqtyq máseleler boıynsha pikir almastyq. Jahandyq geosaıası ahýaldyń ýshyǵýyna, qaqtyǵystardyń kóbeıýine bárimiz alańdap otyrmyz. Álemdegi kóptegen túıtkilge qatysty memleketterimizdiń ustanymy uqsas, — dedi Qasym-Jomart Toqaev.
Prezıdenttiń paıymynsha, BUU Jarǵysynyń jáne halyqaralyq quqyq normalarynyń talaptary qatań saqtalýǵa tıis.
— Kez kelgen janjaldy kelisim arqyly dıplomatııalyq jolmen sheshý qajet dep sanaımyz. Biz bolashaqta da halyqaralyq deńgeıde kúsh biriktirip, tıimdi jumys isteýge, beıbitshilik pen turaqtylyqty qamtamasyz etýge belsene atsalysamyz dep kelistik. Búgingi sapar eki eldiń yntymaqtastyǵyn odan ary nyǵaıta túsetini anyq. Buǵan qos tarap ta múddeli. «Jumyla kótergen júk jeńil», deıdi. Birlesip áreket etsek, ortaq maqsattarǵa qol jetkizemiz dep senemin, — dedi Memleket basshysy.
Buǵan deıin Serbııa Prezıdenti Aleksandr Výchıch Qazaqstannyń eń joǵary nagradasy «Altyn qyran» ordenimen marapattalǵanyn jazǵan edik.
