Qazaqstan men Serbııa jańa ınvestıtsııalyq baǵyttardy talqylady
ASTANA. KAZINFORM — Memleket basshysy Serbııa Prezıdenti Aleksandr Výchıchpen telefon arqyly sóılesti. Bul týraly Aqordanyń baspasóz qyzmeti habarlady.
Aleksandr Výchıch Qasym-Jomart Toqaevty Quryltaı saılaýynyń sátti ótýimen quttyqtap, Prezıdent reformalary azamattardyń joǵary qoldaýyna ıe bolǵanyn atap ótti.
Memleket basshysy Serbııa Prezıdentine rızashylyǵyn bildirip, elimizde qolǵa alynǵan ishki saıası ózgerister jóninde málimet berdi. Sonymen qatar Qazaqstannyń saıası júıesindegi aýqymdy transformatsııanyń tarıhı mánine toqtaldy.
Qasym-Jomart Toqaev pen Aleksandr Výchıch qazaq-serb qarym-qatynasynyń qazirgi jaı-kúıin jáne damý perspektıvasyn talqylady.
Taraptar ekijaqty seriktestiktiń ornyqty dınamıkasyna kóńil tolatynyn aıtyp, iskerlik baılanystardy nyǵaıtýǵa jáne energetıka, kólik-logıstıka, aýyl sharýashylyǵy, tsıfrlandyrý salalaryndaǵy birlesken ınvestıtsııalyq jobalardy ilgeriletýge múddeli ekenderin jetkizdi.
Aıta ketelik Qazaqstan Serbııamen saýda-ekonomıkalyq baılanystardy kúsheıtetini týraly jazǵan edik.
