Qazaqstan men Serbııa yntymaqtastyǵynyń basym baǵyttary qandaı
ASTANA. QazAqparat - Qazaqstan men Serbııa ózara saýda-sattyqta jetkiziletin taýar suryptalymyn keńeıtýge nıetti. Bul týraly búgin Qazaqstanǵa resmı saparmen kelgen Serbııa Prezıdenti Aleksandr Výchıchpen kelissózderden keıingi birlesken málimdeme barysynda Elbasy Nursultan Nazarbaev aıtty, dep habarlaıdy QazAqparat tilshisi.
«Bizdiń ekonomıkalarymyz birin-birin tolyqtyra alady. Biz jetkiziletin taýardyń suryptalymyn keńeıtýge daıynbyz. Búgin kóptegen jaıttyń basyn ashtyq. ıAǵnı Serbııada baryn Qazaqstanǵa, bizde baryn Serbııaǵa jetkizip, ózara aıyrbas jasaı alamyz. Bizdiń ekonomıkalarymyz bul jumystardy júrgize alady», - dedi Elbasy.
Osy oraıda Qazaqstan Prezıdenti elimizdiń aýmaǵynda serb kapıtalynyń qatysýymen 20 kásiporyn jumys istep turǵanyn aıtty.
«Biz ekinshi otyrys kúni keshe osy jerde ótken saýda-ekonomıkalyq yntymaqtastyq jónindegi úkimetaralyq komıssııanyń aldyna jańa mindetter qoıdyq. Basym baǵyttardy aıqyndadyq. Olar: aýyl sharýashylyǵy, ónerkásip, qurylys, kólik, energetıka jáne basqa salalar», - dedi Memleket basshysy.
Memleket basshysy Qazaqstannyń Azııa men Eýropa arasynda júk jetkizýdi jedeldetý úshin ınfraqurylym qurýǵa múddelik tanytatyndyǵyn basa aıtty.
«Serbııanyń EAEO-men erkin saýda aımaǵyn qurý týraly eksperttik kelissózderi jalǵasýda. Bizdiń resmı kelissózderimiz búgin ótetin bıznes forýmda iskerlik arnaǵa aýysady. Onyń qorytyndysynda bizdiń bıznes qurylymdar arasynda mańyzdy ekonomıkalyq kelisimsharttarǵa qol qoıylady», - dedi Nursultan Nazarbaev.
Aıta keteıik, Serbııa basshysy Qazaqstan Prezıdenti Nursultan Nazarbaevtyń shaqyrýymen resmı saparmen kelip otyr. Búgin mártebeli meıman Aqordada Nursultan Nazarbaevpen kezdesý ótkizdi.
Kezdesý barysynda Nursultan Nazarbaev Serbııa Prezıdentin «Dostyq» ordenimen marapattady.
Al Aleksandr Výchıch Qazaqstan Prezıdentine óz eliniń eń joǵary nagradasy «Serbııa Respýblıkasy» ordenin tabys etti.
Sapar aıasynda Aleksandr Výchıch Qazaqstan-Serbııa iskerlik forýmyna, Álemdik jáne dástúrli dinder kóshbasshylarynyń VI seziniń ashylýyna qatysady dep josparlanǵan.
Serbııa prezıdentiniń sapary barysynda birqatar mańyzdy qujattarǵa qol qoıylmaq. Onyń ishinde Qazaqstan men Serbııa úkimetteri arasyndaǵy qylmysqa qarsy kúrestegi yntymaqtastyq týraly kelisim, sondaı-aq, Qazaqstannyń Qoǵamdyq damý mınıstrligi men Serbııanyń jastar saıasaty jáne soprt mınıstrligi arasyndaǵy ózara túsinistik týraly memorandým bar.
