Qazaqstan men Serbııa týrızm salasyndaǵy yntymaqtastyqty nyǵaıtý jaıyn talqylady
ALMATY. KAZINFORM — Almatyda ótken qazaqstandyq-serbtik Úkimetaralyq komıssııasynyń (ÚAK) IV otyrysynda Serbııaǵa qazaqstandyq joǵary sapaly aýyl sharýashylyǵy ónimderiniń eksportyn ulǵaıtý týraly usynys aıtyldy. ÚAK teń tóraǵalary - vıtse-premer - ulttyq ekonomıka mınıstri Serik Jumanǵarın men úkimet tóraǵasynyń orynbasary, ishki ister mınıstri Ivıtsa Dachıch.
Óz sózinde Serik Jumanǵarın eki el arasyndaǵy yntymaqtastyqtyń eń perspektıvalyq baǵyty saýda men kólik, aýyl sharýashylyǵy, densaýlyq saqtaý, týrızm, ǵylym, bıotehnologııa, bilim men mádenıet ekenin atap ótti.
Agrarlyq saýdanyń ósýi eki eldiń áleýetin aıǵaqtaıdy: 2025 jylǵy birinshi jartyjyldyq qorytyndysy boıynsha aýyl sharýashylyǵy óniminiń taýar aınalymy 1,5 esege artyp, 4 mln AQSh dollaryna jetken. Qazaqstan astyq jáne burshaq daqyly, ósimdik maıy, balyq, et pen sút ónimi eksportyn arttyrýǵa múddeli.
«Búgingi tańda Eýropalyq komıssııa qazaqstandyq balyq ónimin EýroOdaq elderine eksporttaýǵa qoıylatyn talapty kelisti. EO tizilimine kókserke jon eti men balyq ónimin jetkizetin 20 qazaqstandyq kásiporyn engizilgen. Osy jylǵy aqpanda biz Eýropalyq Odaqqa bal eksporttaýǵa ruqsat aldyq. Qazaqstandyq 4 iri bal óndirýshi kompanııa óz ónimderin Eýropaǵa jetkizýge daıyn. Budan basqa, akvadaqyldardy jáne jylqy eti ónimin EO elderi naryǵyna jetkizý boıynsha Eýrokomıssııamen jumys júrgizilýde», — dedi aýyl sharýashylyǵy vıtse-mınıstri Ermek Kenjehanuly.
Sondaı-aq, qazaqstandyq tarap mal sharýashylyǵy men ósimdik sharýashylyǵy ónimin qaıta óńdeý salasynda birlesken ınvestıtsııalyq jobalardy iske asyrýdy usyndy. Yntymaqtastyqtyń perspektıvaly bir baǵyty – ǵylymı-zertteý salasy. Onyń ishinde selektsııa men tuqym sharýashylyǵy salasynyń mamandaryn daıarlaý, Qazaqstannyń túrli óńirlerinde dándi, maıly jáne kókónis daqyly tuqymdaryna dalalyq synaqtar júrgizý, birlesken býdan qurý, bıopestıtsıd óndirisindegi yntymaqtastyq bar.
Otyrys barysynda Qazaqstan Belgradta kópfýnktsıonaldy qonaq úı keshenin salýǵa daıyn ekenin jetkizdi (jeke ınvestıtsııalar esebinen). Týrızm jáne sport vıtse-mınıstri Erjan Erkinbaevtyń aıtýynsha, joba týrıstik ınfraqurylymdy damytýǵa serpin berip, eki el arasyndaǵy iskerlik jáne mádenı baılanystardy nyǵaıtady.
Sonymen qatar, vıtse-mınıstr Túrkistan qalasyndaǵy Halyqaralyq týrızm jáne qonaqjaılylyq ýnıversıteti men Belgradtaǵy Sıngıdýným ýnıversıteti arasynda seriktestik ornatýdy usyndy. Bul stýdentter men oqytýshylardyń akademııalyq utqyrlyq baǵdarlamasyn damytýǵa, týrızm salasyndaǵy qazaqstandyq jáne serbııalyq ǵalymdardyń birlesken ǵylymı-zertteý jobalaryn iske asyrýǵa yqpal etpek. Sondaı-aq serbııalyq týrkompanııalardy 2026 jylǵy sáýirde Almatyda ótetin «Týrızm jáne saıahat» atty jyl saıynǵy Qazaqstandyq halyqaralyq kórmege qatysýǵa shaqyrdy.
Taraptar Transkaspıı halyqaralyq kólik baǵytyn Eýropaǵa, onyń ishinde Serbııaǵa qaraı uzartý perspektıvasyn zertteýdi jalǵastyrýǵa ýaǵdalasty. Astana men Belgrad arasynda bıyl tikeleı áýe qatynasyn ashý jaıyn talqylady.
Tikeleı reısti SCAT áýe kompanııasy júzege asyrady. Búginde eki eldiń áýe kompanııalary áýe reısin iske qosýdyń barlyq qajetti rásimin júrgizýde. Baǵyttyń tartymdylyǵyn arttyrý úshin áýe jolyn Belgradtan Marokko, Týnıs, Barselona men Larnakaǵa deıin uzartý týraly kelisim jasalýda.
Sondaı-aq, osy jyly Serbııaǵa saýda-ekonomıkalyq mıssııa uıymdastyryp, alǵashqy qazaqstandyq-serbtik iskerlik keńes ótkizý týraly sheshim qabyldady. Bul eki eldiń iskerler toby arasyndaǵy saýda-ekonomıkalyq qatynas pen ınvestıtsııalyq baılanysty nyǵaıta túsýge múmkindik bermek.
Qatysýshylar ÚAK-ta kóterilgen máselelerdiń egjeı-tegjeıin ekijaqty kezdesýde taǵy talqylady.
Otyrys qorytyndysy boıynsha qol jetkizilgen ýaǵdalastyqtardy bekitetin hattamaǵa qol qoıyldy. Úkimetaralyq komıssııanyń kelesi otyrysyn 2026 jyly Serbııada ótkizý josparlanyp otyr.
Aıta keteıik, maýsym aıynda Qazaqstan men Serbııa statıstıka salasyndaǵy yntymaqtastyq týraly memorandýmǵa qol qoıdy.