Qazaqstan men Serbııa statıstıka salasyndaǵy yntymaqtastyq týraly memorandýmǵa qol qoıdy
JENEVA. KAZINFORM — Jenevada ótip jatqan Eýropalyq statıstıkter konferentsııasynyń 73-shi plenarlyq sessııasy aıasynda Qazaqstan Respýblıkasynyń Ulttyq statıstıka bıýrosy men Serbııa Respýblıkasynyń Statıstıka basqarmasy statıstıka salasyndaǵy ekijaqty yntymaqtastyqty keńeıtýge baǵyttalǵan ózara túsinistik týraly memorandýmǵa qol qoıdy.
Qujatta taraptardyń ózara is-qımyldy nyǵaıtý jáne statıstıka salasyndaǵy baǵdarlamalar men jobalardy birlesip ázirleý jáne iske asyrý úshin turaqty platforma qurý nıeti bekitilgen. Memorandým eki eldiń statıstıkalyq júıelerin damytýdy, aqparat jáne taldamalyq tásildermen almasýdy, sondaı-aq birlesken is-sharalar men jobalardy ótkizýdi kózdeıtin jalpy mehanızmdi qarastyrady.
– Serbııa – derekterdi jınaýda ınnovatsııalyq tásilderdi belsendi túrde engizip jatqan elderdiń biri. Bizdiń memorandým statıstıka salasyndaǵy kásibı standarttardy ilgeriletýge jáne derekterdiń ashyqtyǵy men senimdiliginiń joǵary deńgeıin qamtamasyz etýge baǵyttalǵan. Yntymaqtastyq qundy tájirıbeni ıgerýge ári úzdikterin engizýge múmkindik beredi dep senemiz, – dep atap ótti Bıýro basshysy Maqsat Turlybaev.
Memorandýmǵa qol qoıý Qazaqstannyń statıstıka salasyndaǵy halyqaralyq áriptestigin nyǵaıtýdaǵy mańyzdy qadam boldy jáne ulttyq statıstıka júıesin transformatsııalaý, sondaı-aq qazaqstannyń halyqaralyq statıstıkalyq qoǵamdastyqtaǵy qatysýyn keńeıtý jónindegi strategııalyq maqsattarǵa jaýap beredi.
Aıta keteıik, 16-18 maýsymda Jenevada ótip jatqan Eýropalyq statıstıkter konferentsııasynyń (CES 2025) 73-shi sessııasynda resmı statıstıkany damytýdyń negizgi baǵyttary talqylanýda. Tsıfrlandyrý jaǵdaıyndaǵy statıstıka organdarynyń róli, derekterge senimdilikti nyǵaıtý jáne jalǵan aqparatqa qarsy is-qımyl, kóshi-qon statıstıkasyna jańa tásilder, sondaı-aq saýalnama júrgizýdiń zamanaýı modelderin damytý taqyryptary bar. Ákimshilik jáne jeke derekterdi paıdalanýǵa, 2030 jylǵy halyq sanaǵyna daıyndyqqa, statıstıkalyq bıznes-protsester modelin (GSBPM 5.2 nusqasy) jańartýǵa, sondaı-aq etıka máselelerine jáne statıstıkalyq tájirıbede Open Source sheshimderin engizýge erekshe nazar aýdarylady.
Eske sala keteıik, Ulttyq statıstıka bıýrosy elimizde mamyr aıynda 128 myń avtokólik esepke qoıylǵanyn jarııalaǵan edi.