Qazaqstan men Serbııa Prezıdentteri ekijaqty yqpaldastyq máselelerin talqylady
ASTANA. QazAqparat - Nursultan Nazarbaev Serbııa Respýblıkasynyń Prezıdenti Tomıslav Nıkolıchpen telefon arqyly sóılesti.
Bul týraly Aqordanyń baspasóz qyzmetinen habarlady.
Áńgimelesý barysynda taraptar ekijaqty ózara is-qımyldyń ózekti máselelerin talqylady.
Memleketter basshylary Qazaqstan Prezıdentiniń Belgradqa 2016 jylǵy 23-25 tamyzdaǵy resmı saparynyń qorytyndysy boıynsha qol jetkizilgen ýaǵdalastyqtardyń iske asyrylý barysyna kóńilderi tolatynyn atap ótti.
T.Nıkolıch Nursultan Nazarbaevtyń basshylyǵymen Qazaqstanda saıası jáne ekonomıkalyq jańǵyrtý baǵytynda júzege asyrylyp jatqan reformalarǵa joǵary baǵa berdi.
Eki eldiń prezıdentteri Qazaqstan men Serbııanyń dostyq qarym-qatynasyn odan ári nyǵaıtýǵa ázir ekendigin rastady.
Telefon arqyly sóılesýge Serbııa jaǵy bastamashy boldy.
