Qazaqstan men Serbııa parlamentaralyq yntymaqtastyqty nyǵaıtýǵa nıetti
ASTANA. QazAqparat - Májilis tóraǵasynyń orynbasary Gúlmıra Isımbaeva Qazaqstanǵa alǵash ret resmı saparmen kelgen Serbııa Respýblıkasy Halyqtyq Skýpşınasynyń tóraıymy Maııa Goıkovıchpen kezdesti, dep habarlaıdy QazAqparat palatanyń baspasóz qyzmetine silteme jasap.
Júzdesý barysynda memleketaralyq, sonyń ishinde parlamentaralyq qarym-qatynasty odan ári tereńdetýdiń ózekti máseleleri talqylandy.
G. Isımbaeva atap ótkendeı, Qazaqstan Prezıdenti Nursultan Nazarbaev pen Serbııa Prezıdenti Aleksandr Výchıchtiń joǵary deńgeıdegi kezdesýleri eki el arasyndaǵy saıası yntymaqtastyń jarqyn kórsetkishi. Májilis tóraǵasy orynbasarynyń aıtýynsha, Qazaqstan Serbııamen saýda-ekonomıkalyq baılanysty odan ári nyǵaıtýǵa yntaly. Ol úshin barlyq qolaıly jaǵdaılar jasalǵan. Sondaı-aq aýylsharýashylyǵy, kóliktik-logıstıkalyq, farmatsevtıkalyq jáne týrızm salalary da basym baǵyttar qatarynda.
Taraptar halyqtar arasyndaǵy tatýlyq jaıyn sóz ete kelip, etnıkaaralyq jáne dinaralyq kelisimdi qamtamasyz etý ári retteý máselesinde Qazaqstan men Serbııanyń tájirıbesi mol ekenine toqtaldy.
Mártebeli meıman óz sózinde Qazaqstan basqa elder múddesine qaıshy kelmeıtin halyqaralyq deńgeıdegi beıbit bastamalardyń arqasynda BUU Kaýipsizdik Keńesiniń turaqty emes múshesi atanǵanyn jáne Sırııa máselelerin retteý boıynsha mańyzdy kelissóz alańyna aınalǵanyn atap ótti.
Kezdesý sońynda taraptar barlyq múmkindikti paıdalanyp, ekijaqty qarym-qatynasty jan-jaqty nyǵaıtýǵa ýaǵdalasty.
