Qazaqstan men Serbııa ınvestıtsııa, tsıfrlandyrý jáne ónerkásip salalaryndaǵy áriptestikti kúsheıtpek
ASTANA. KAZINFORM — QR Úkimetinde Serbııa prezıdenti Aleksandr Výchıch pen Qazaqstan Respýblıkasynyń Premer-mınıstri Oljas Bektenovtiń kezdesýi ótti. Onda joǵary deńgeıde júrgizilgen kelissózder aıasynda saýda-ekonomıkalyq yntymaqtastyqty odan ári keńeıtý jónindegi sharalar qaraldy.
Úkimettiń baspasóz qyzmeti málim etkendeı, ınvestıtsııalar, kólik jáne logıstıka, tsıfrlyq sala jáne JI, ónerkásip, qurylys, aýyl sharýashylyǵy, týrızm, bilim berý jáne taǵy da basqa salalardaǵy ózara is-qımyl máselelerine nazar aýdaryldy.
— Búgin Siz Memleket basshysy Qasym-Jomart Kemeluly Toqaevpen nátıjeli kelissóz júrgizdińiz. Qazaqstan Úkimeti joǵary deńgeıde qol jetkizilgen barlyq ýaǵdalastyqtyń oryndalýyn erekshe baqylaýǵa alady. Bizdiń derekterimiz boıynsha, 2025 jyly ózara saýda kólemi $107,7 mln qurap, ótken jylmen salystyrǵanda 7,6%-ǵa ósti. Bul kórsetkish odan da aýqymdy nátıjelerge qol jetkizý úshin ońtaıly negiz bola alady. Biz uzaq merzimdi yqpaldastyqty odan ári jalǵastyrýǵa nıettimiz, — dep atap ótti Oljas Bektenov.
Serbııa Prezıdenti Aleksandr Výchıch Qazaqstanmen energetıka, qorǵanys ónerkásibi, qurylys, azamattyq avıatsııa, jasandy ıntellekt jáne aqparattyq tehnologııalar, sondaı-aq bilim berý sııaqty perspektıvaly baǵyttar boıynsha áriptestikti damytýǵa umtylysyn rastady.
— Qazaqstan Prezıdenti Qasym-Jomart Toqaev ekeýmiz seriktestik aıasyndaǵy barlyq úderisti tikeleı qadaǵalap otyramyz. Sondaı-aq bul iske bizdiń elderdiń úkimetteri de belsendi qatysyp otyrǵanyn jaqsy bilemiz. Bizge Qazaqstannyń bilim salasyndaǵy tájirıbesi qyzyqty. Osyǵan baılanysty qazaqstandyq sarapshylardy sheteldik joǵary oqý oryndarynyń kampýstaryn ashý, dýaldy bilim berýdi damytý, stýdentterdi shetelde oqytý tájirıbesimen bólisý úshin Serbııaǵa shaqyrǵymyz keledi, — dep atap ótti Serbııa Prezıdenti Aleksandr Výchıch.
Kezdesý barysynda Serbııamen tsıfrlyq transformatsııa salasyndaǵy yntymaqtastyqty keńeıtý isiniń úlken áleýeti atap ótildi. Qazaqstanda Memleket basshysy jarııalaǵan Tsıfrlandyrý jáne jasandy ıntellekt jyly aıasynda zamanaýı tsıfrlyq ekojúıe qalyptasýda. Ortalyq Azııada eki sýperkompıýter klasteri iske qosyldy, Alem.ai halyqaralyq jasandy ıntellekt ortalyǵy quryldy, CryptoCity pılottyq aımaǵy jáne taǵy da basqa da jobalar júzege asyrylyp jatyr.
Kólik ıntegratsııasy máseleleri talqylaý kezinde Orta dálizdi damytýǵa jáne Qazaqstanda júrgizilip jatqan jańa ınfraqurylymdy salý jumystaryna, onyń ishinde temirjol jáne avtokólik jelileri, teńiz termınaldary jáne halyqaralyq avıatsııalyq habtardy qurýǵa erekshe nazar aýdaryldy.
Agroónerkásip sektoryndaǵy, onyń ishinde selektsııa jáne tuqym sharýashylyǵy salasyndaǵy áriptestikti tereńdetý perspektıvalary da atap ótildi. Oljas Bektenov qazaqstandyq óndirýshilerdiń joǵary sapaly aýyl sharýashylyǵy ónimderiniń keń assortımentin eksporttaýǵa jáne qaıta óńdeý salasyndaǵy yntymaqtastyqqa daıyn ekendigin atap ótti.
Belgradta ótetin EXPO 2027 kórmesin eskere otyryp, qazaqstandyq tarap Serbııamen 2017 jyly Astanada mamandandyrylǵan kórmeni ótkizý kezinde jınaqtaǵan tájirıbesimen bólisýge daıyn.
Kezdesý qorytyndysy boıynsha QR Premer-mınıstri Oljas Bektenov pen Serbııa prezıdenti Aleksandr Výchıch barlyq perspektıvaly baǵyttar boıynsha ekijaqty yntymaqtastyqty serpindi damytý men nyǵaıtýǵa beıildi ekenin bildirdi.
Serbııa prezıdenti Aleksandr Výchıch Qazaqstanǵa resmı sapary aıasynda qazaqstandyq qorǵanys ónerkásibiniń, onyń ishinde qorǵanys-ónerkásip kesheni salasyndaǵy Qazaqstan men Serbııanyń birlesken jobalarynyń kórmesine, «Astana» halyqaralyq qarjy ortalyǵyna jáne Alem.ai halyqaralyq jasandy ıntellekt ortalyǵyna bardy.
AHQO-da ortalyq jumysynyń negizgi baǵyttary, onyń ishinde ınvestıtsııalardy tartý, mámilelerdi bir qurylymǵa keltirý, kapıtal naryǵyn damytý jáne halyqaralyq jobalarǵa qoldaý kórsetý jónindegi quraldar tanystyryldy. Bıznesti servıstik qoldaý ınfraqurylymyna erekshe nazar aýdaryldy. AHQO basqarýshysy Renat Bekturov AHQO tartqan ınvestıtsııalardyń jıyntyq kólemi búginde $20 mlrd-tan asqanyn baıandady.
Aleksandr Výchıch Alem.ai ortalyǵynda Qazaqstannyń tsıfrlyq salany jáne JI-tehnologııalardy damytýǵa baǵyttalǵan júıeli tásilderimen tanysty. Serbııa prezıdentiniń nazaryna otandyq ázirlemeler men jasandy ıntellekt-startaptar usynyldy. Astana Hub-ta IT-startaptardy qoldaý júıesine jáne jetekshi álemdik kompanııalarmen yntymaqtastyqty damytýǵa kóńil bólindi. Sondaı-aq onda BestVision – ónerkásip pen taý-ken óndirisi úshin AІ-monıtorıngi, beınesaraptamasy jáne trekıngi bar aqyldy kaska ázirleýshi; KazDream – baǵdarlamalyq qamtamasyz etý, derekterdi taldaý jáne jasandy ıntellekt salasyndaǵy startap; Documentolog – elektrondyq qujat aınalymyn avtomattandyrýǵa arnalǵan ulttyq bultty servıs; Nace.AI – AI agentterine negizdelgen basqarý jáne operatsııalyq protsesterdi avtomattandyrýǵa arnalǵan jasandy ıntellekt (JI) platformasy sııaqty qazaqstandyq startaptar tanystyryldy.
Budan buryn kelissóz qorytyndysy boıynsha Prezıdent Qasym-Jomart Toqaev pen Prezıdent Aleksandr Výchıch Birlesken málimdeme qabyldap, 10 memorandýmǵa qol qoıylǵany habarlandy.