Qazaqstan men Serbııa energetıka salasyndaǵy seriktestikti nyǵaıtyp jatyr
ASTANA. KAZINFORM — Energetıka mınıstri Erlan Aqkenjenov Serbııa Respýblıkasynyń Halyqaralyq ekonomıkalyq yntymaqtastyqty damytý jónindegi mınıstri Nenad Popovıchpen kezdesti.
Kelissóz eki el basshylary deńgeıinde qol jetkizilgen ýaǵdalastyqtardyń qısyndy jalǵasy boldy. Erlan Aqkenjenov atap ótkendeı, Qazaqstan men Serbııa arasyndaǵy ekijaqty qarym-qatynastar árqashan ózara qurmetpen jáne syndarly yntymaqtastyqpen erekshelenedi.
— Energetıka — eki eldiń ekonomıkalyq turaqtylyǵy men energetıkalyq qaýipsizdiginiń strategııalyq faktory. Búgingi tańda biz munaı-gaz salasynda, elektr energetıkasynda, jańartylatyn energııa kózderi boıynsha ózara is-qımyldy nyǵaıtýdyń, sondaı-aq birlesken ınvestıtsııalyq jobalardy iske asyrýdyń zor múmkindikterin kórip otyrmyz. Memleketterimizdiń basshylary deńgeıindegi dıalog praktıkalyq yntymaqtastyqqa qosymsha serpin bergenine senimdimin. Bul tájirıbe almasýǵa jáne elderimiz úshin paıdaly naqty jobalardyń iske asyrylýyna yqpal etedi, — dedi Energetıka mınıstri.
Kelissózder barysynda Erlan Aqkenjenov energetıka salasyndaǵy negizgi basymdyqtar men Qazaqstannyń múmkindikterin tanystyrdy. Kezdesýge qatysýshylar belgilengen josparlardy iske asyrý ekonomıkalyq damýdy yntalandyryp, Astana men Belgrad arasyndaǵy ekijaqty baılanystardy nyǵaıta túsetinine senim bildirdi.
Aıta ketelik Prezıdent Energetıka mınıstrliginiń burynǵy basshylaryn synǵa alǵan edi.