Qazaqstan men Saýd Arabııasy arasynda ekonomıkalyq yntymaqtastyqty arttyrý kózdeledi - Májilis
ASTANA. QazAqparat - Búgin Parlament Májilisiniń jalpy otyrysynda palata depýtattary «QR Úkimeti men Saýd Arabııasy Koroldiginiń Úkimeti arasyndaǵy tabysqa salynatyn salyqtarǵa qatysty qosarlanǵan salyq salýdy boldyrmaý jáne salyq salýǵa jol bermeý týraly konventsııany jáne oǵan Hattamany ratıfıkatsııalaý týraly» zań jobasyn maquldady. Hattamaǵa 2011 jyldyń 7 maýsymynda qol qoıylǵan.
Qujattyń maqsaty ınvestıtsııalar úshin qolaıly jaǵdaılar jasaý jolymen Qazaqstan men Saýd Arabııasy Koroldigi arasyndaǵy ekonomıkalyq yntymaqtastyqty nyǵaıtý jáne keńeıtý bolyp tabylady. Konventsııa ýaǵdalasýshy memleketterdiń bireýiniń nemese ekeýiniń de rezıdentteri bolyp tabylatyn tulǵalarǵa qoldanylady.
«Konventsııa eki memlekettegi zańdy jáne jeke tulǵalarǵa qosarlanǵan salyq salýdy joıýǵa múmkindik beredi. Salyq tóleýshige bir ret, ıaǵnı ýaǵdalasýshy memleketterdiń birinde ǵana salyq tóleý rásimi bekitiledi. Al áriptes memleket salyqtyń tólengen somasyn esepke jatqyzady. Ekinshiden, ınvestıtsııalar úshin qolaıly jaǵdaılar jasaý arqyly Qazaqstan men Saýd Arabııasy arasyndaǵy ekonomıkalyq yntymaqtastyqty nyǵaıtýǵa jol ashady. Úshinshiden, memleketterdiń quzyretti organdary arasynda salyq máseleleri boıynsha aqparat almasý arqyly salyqtan jaltarýdan boldyrmaý máselesi retteledi», dedi Qarjy mınıstri Baqyt Sultanov.
Aıta keterligi, Konventsııada qoldanylatyn salyqtar Qazaqstan Respýblıkasynda korporatıvtik tabys salyǵy, al Saýd Arabııasynda zeket bolyp tabylady. Budan bólek, tabıǵı gazdyń ınvestıtsııalyq salyǵyn qamtıtyn tabys salyǵy da enip otyr.
Májilis maquldaǵan zań jobasy Parlament Senatyna joldanady.
