Qazaqstan men Saýd Arabııasy taý-ken metallýrgııa sektoryndaǵy áriptestikti kúsheıtpek
ASTANA. KAZINFORM – Qazaqstan men Saýd Arabııasy arasyndaǵy taý-ken metallýrgııa salasyndaǵy áriptestik jańa deńgeıge kóterilip, jahandyq shıkizat naryǵyndaǵy ózgeristerdiń mańyzdy bóligine aınalyp otyr. Álemde mıneralddyq resýrstarǵa suranys artyp otyrǵan kezeńde eki el ınvestıtsııa, tehnologııa jáne logıstıka baǵyttaryndaǵy yntymaqtastyqty kúsheıtip, jańa jetkizý tizbekterin qalyptastyrýǵa kiristi.
Bul týraly búgin astanada ótip jatqan 16-Halyqaralyq taý-ken metallýrgııa kongresinde Saýd Arabııasy ónerkásip jáne mıneraldyq resýrstar mınıstri Bandar bın Ibrahım Ál-Hýraıf aıtty.
Jıynda sóz alǵan Saýd Arabııasynyń ókili Qazaqstanda ótken halyqaralyq forým aıasyndaǵy kezdesýlerdiń joǵary deńgeıde uıymdastyrylǵanyn atap ótti.
– Qazaqstan men Saýd Arabııasy arasyndaǵy yntymaqtastyq tek saýda-ekonomıkalyq baılanystarmen shektelmeı, ınvestıtsııa, tehnologııa jáne logıstıka baǵyttarynda tereńdeı túsýi tıis. Eki eldiń resýrstyq áleýeti men ekonomıkalyq múmkindikteri birin-biri tolyqtyryp, jańa birlesken jobalarǵa jol ashýy kerek, - dedi Ibrahım Ál-Hýraıf.
Eki el uzaq merzimdi jobalarǵa basymdyq bermek
Ál-Hýraıf Qazaqstan Premer-mınıstrimen jáne ónerkásip salasyna jaýapty memlekettik organdarmen ótken kelissózderge erekshe toqtaldy. Sondaı-aq ol Astana halyqaralyq qarjy ortalyǵynyń basshylyǵymen jáne eldegi iri kompanııalarmen ótken kezdesýlerdiń tájirıbelik mańyzy joǵary bolǵanyn jetkizdi.
– Biz Qazaqstanmen uzaq merzimdi seriktestik ornatýǵa úlken qyzyǵýshylyq tanytyp otyrmyz. Eki eldiń de resýrstyq bazasy, geografııalyq ornalasýy jáne óndiristik áleýeti ózara tıimdi jobalardy júzege asyrýǵa múmkindik beredi, - dedi Saýd Arabaııa ókili.
Ol sondaı-aq Saýd Arabııasy men Qazaqstannyń geologııalyq barlaý jáne jer qoınaýyn ıgerý salalarynda birin-biri tolyqtyratyn múmkindikteri bar ekenin atap ótti. Qazaqstannyń aýyl sharýashylyǵy jáne óndiristik áleýeti, al Saýd Arabııasynyń qaıta óńdeý jáne ónerkásiptik ınfraqurylymy birlesken qun tizbekterin qalyptastyrýǵa yqpal etedi.
– Saýd Arabııasy 2023 jyly qabyldanǵan damý strategııasy aıasynda taý-ken metallýrgııa sektoryn basty baǵyttardyń biri retinde belgiledi. Bul sala el ekonomıkasyn ártaraptandyrýmen qatar, jahandyq shıkizat naryǵyndaǵy turaqtylyqty qamtamasyz etýge baǵyttalǵan, - dedi ol.
Geologııalyq barlaý men ınvestıtsııa kólemi artyp keledi
Ál-Hýraıf ken óndirý salasynyń kúrdeli ári kapıtaldy qajet etetinin, sondyqtan uzaq merzimdi ınvestıtsııalar men joǵary tehnologııalardyń róli erekshe ekenin aıtty.
– Tsıfrlandyrý men ınnovatsııalar bul sektordyń bolashaǵyn aıqyndaıtyn negizgi faktorlarǵa aınalyp keledi, - dedi SA ókili.
Sonymen qatar ol logıstıkalyq ınfraqurylymnyń jahandyq saýda men shıkizat qozǵalysyndaǵy sheshýshi rólin atap ótti. Saýd Arabııasy óziniń energetıkalyq resýrstary, ónerkásiptik bazasy jáne strategııalyq geografııalyq ornalasýy arqyly halyqaralyq jetkizý tizbekterinde mańyzdy oryn alyp otyrǵanyn da atap ótti.
Taraptar aldaǵy kezeńde naqty ınvestıtsııalyq jobalardy iske qosý, geologııalyq barlaý salasynda birlesken jumystar júrgizý jáne jeke sektor arasyndaǵy áriptestikti keńeıtý boıynsha kelisimderdi jalǵastyrmaq.
Aıta keteıik, búgin elordada taý-ken metallýrgııa salasyndaǵy eń iri halyqaralyq alańdardyń biri — 16-Astana Mining & Metallurgy (AMM 2026) halyqaralyq taý-ken metallýrgııa kongresi óz jumysyn bastady. Atalǵan is-sharaǵa 15 elden 69 kompanııa qatysyp jatyr. Olardyń qatarynda Aýstralııa, Germanııa, Italııa, Kanada, Qytaı, Saýd Arabııasy, AQSh, Fınlıandııa, Frantsııa, Chehııa jáne Shvetsııa sekildi memleketter bar.
Buǵan deıin aıtýly sharaǵa qatysqan Úkimet basshysy 2026-2028 jyldary geologııalyq barlaý jumystaryna memleket tarapynan shamamen 470 mln dollar ınvestıtsııa salynatynyn atap ótken edi.
