Qazaqstan men Saýd Arabııasy jańa kólik-logıstıkalyq baǵyttardy damytýǵa nıetti
ASTANA. KAZINFORM - Qazaqstannyń Saýd Arabııasyndaǵy Elshisi Madııar Meńilbekov Koroldiktiń Kólik jáne logıstıkalyq qyzmetter mınıstri Saleh Ál-Djassermen kezdesý ótkizdi, dep habarlaıdy QR syrtqy ister mınıstrliginiń baspasóz qyzmeti.
Kelissózder barysynda taraptar 2026 jylǵy 26 tamyzda Qazaqstan Respýblıkasynyń Úkimeti men Saýd Arabııasy Koroldiginiń Úkimeti arasynda áýe qatynasy týraly kelisimge qol qoıylýyn quptady jáne onyń ekijaqty baılanystardy odan ári nyǵaıtýdaǵy mańyzdy mánin atap ótti.
Úkimetaralyq qujat tikeleı áýe qatynasyn keńeıtýge, jolaýshylar jáne júk tasymaldarynyń kólemin arttyrýǵa, sondaı-aq saýda-ekonomıkalyq, ınvestıtsııalyq, týrıstik jáne gýmanıtarlyq ózara is-qımyldy damytý úshin jańa múmkindikter ashýǵa berik negiz bolatyny atap ótildi.
Kezdesý barysynda kólik-logıstıka salasyndaǵy yntymaqtastyqty damytý perspektıvalaryna erekshe nazar aýdaryldy.
Taraptar tranzıttik tasymaldar salasyndaǵy ózara is-qımyldy keńeıtý, kólik dálizderi men logıstıkalyq ınfraqurylymdy damytý, sondaı-aq júk tasymaldarynyń kólemin ulǵaıtý jáne jańa naryqtarǵa shyǵý úshin Qazaqstan men Saýd Arabııasynyń tranzıttik-kóliktik áleýetin paıdalaný máselelerin talqylady.
Eki eldiń beıindi vedomstvolary men kólik-logıstıka bıznesi ókilderi arasyndaǵy baılanystardy jandandyrýǵa múddelilik bildirildi.
Osyǵan baılanysty taraptar qol jetkizilgen ýaǵdalastyqtardy tıimdi iske asyrýǵa jáne kólik salasyndaǵy praktıkalyq ózara is-qımylǵa qosymsha serpin berýge daıyn ekendikterin rastady.
Kezdesý qorytyndysy boıynsha taraptar Qazaqstan-Saýd Arabııasy yntymaqtastyǵyn odan ári damytýǵa baǵyttalǵan jumys baılanystaryn jalǵastyrýǵa ýaǵdalasty.
Osyǵan deıin Qazaqstan men Saýd Arabııasy arasyndaǵy áýe reısi 28-den 70-ke kóbeıetini týraly jazdyq.
