Qazaqstan men Saýd Arabııasy ekijaqty yntymaqtastyqty tereńdetýge ýaǵdalasty
ASTANA. KAZINFORM — Syrtqy ister mınıstri Ermek Kósherbaev Saýd Arabııasy Koroldigine resmı saparmen bardy.
Delegatsııa quramynda «Samruq-Qazyna» UK» AQ Basqarma tóraǵasy Nurlan Jaqypov jáne Energetıka mınıstri Erlan Aqkenjenov, sondaı-aq memorgandar men kvazımemlekettik mekemelerdiń ókilderi boldy.
Sapardyń basty oqıǵasy koroldiktiń Syrtqy ister mınıstri hanzada Feısal ben Farhan Al Saýdpen kelissózder boldy. Taraptar saıası dıalogty nyǵaıtýǵa, saýda-ekonomıkalyq jáne ınvestıtsııalyq ózara is-qımyldy keńeıtýge, sondaı-aq mádenı-gýmanıtarlyq baılanystardy tereńdetýge basymdyq bere otyryp, qazaq-saýd seriktestiginiń aǵymdaǵy jaı-kúıi men damý perspektıvalaryn jan-jaqty qarastyrdy.
Syrtqy saıası vedomstvolardyń basshylary ózara syılastyq, senim jáne strategııalyq birin-biri tolyqtyrý qaǵıdattaryna negizdelgen ekijaqty qatynastardyń qarqyndy serpinin atap ótti. Basty nazardyń sharttyq-quqyqtyq bazany odan ári jetildirýge jáne yntymaqtastyqty naqty ózara tıimdi jobalarmen tolyqtyrýǵa baǵyttalǵandyǵy rastaldy.
Óńirlik jáne jahandyq kún tártibindegi ózekti máseleler boıynsha jan-jaqty pikir almasý ótti. BUU, IYU, AÓSShK, sondaı-aq OPEK+formatyn qosa alǵanda, halyqaralyq qurylymdar sheńberindegi kúsh-jigerdi úılestirýdiń mańyzdylyǵy atalyp ótti. Vedomstvoaralyq tyǵyz ózara is-qımyldy jalǵastyrý jáne negizgi halyqaralyq máseleler boıynsha tásilderdi kelisý týraly ýaǵdalastyqqa qol jetkizildi.
«Qazaqstan Saýd Arabııasyn Taıaý Shyǵys pen arab álemindegi jaqyn jáne senimdi seriktes retinde qarastyrady. Bizdiń elderimiz mazmundy saıası dıalogty, senimniń bıik deńgeıin jáne jahandyq jáne óńirlik syn – qaterlerdiń keń aýqymy boıynsha ustanymdardyń jaqyndyǵyn biriktiredi», - dep atap ótti Ermek Kósherbaev.
Saýda-ekonomıkalyq jáne ınvestıtsııalyq yntymaqtastyqtyń áleýetin ashýǵa erekshe nazar aýdaryldy. Qazaq tarapy energetıka, ınfraqurylym, agroónerkásiptik keshen jáne «jasyl» ekonomıkany qosa alǵanda, basym sektorlarda saýd kapıtalynyń qatysýyn keńeıtýge múddelilik bildirdi.
Óz kezeginde hanzada Feısal ben Farhan Koroldiktiń iskerlik baılanystardy odan ári jandandyrýǵa jáne ózara qyzyǵýshylyq týdyratyn baǵyttar boıynsha is júzindegi kooperatsııany tereńdetýge daıyndyǵyn rastady.
Sapar aıasynda Qazaqstan SІM basshysy birqatar ekijaqty kezdesýler, onyń ishinde Koroldiktiń Energetıka mınıstri hanzada Abdelazız ben Salman Al Saýdpen, Investıtsııalar mınıstri Fahad Ál-Saıfpen, sondaı-aq ACWA Power kompanııasynyń Basqarma Tóraǵasy Muhammed Abýnaıanmen kezdesý ótkizdi.
Kelissózder dástúrli generatsııa, jańartylatyn energııa kózderi jáne «jasyl» kóshý salasyndaǵy jobalardy qosa alǵanda, energetıkadaǵy salalyq ózara is-qımyldy keńeıtýge, sondaı-aq Saýd Arabııasynyń ınvestıtsııalary men tehnologııalyq sheshimderin Qazaqstan ekonomıkasyna tartý máselelerine baǵyttaldy.
Sapar qorytyndysy boıynsha Qazaqstan men Saýd Arabııasy arasyndaǵy Investıtsııalardy kótermeleý jáne ózara qorǵaý týraly jáne Úılestirý keńesin qurý týraly úkimetaralyq kelisimderge qol qoıyldy.