Qazaqstan men Saýd Arabııasy arasyndaǵy saýda aınalymy 2,9 ese ósti
ASTANA. KAZINFORM — Qazaqstan men Saýd Arabııasy taý-ken óndirisi jáne mańyzdy mıneraldardy ıgerý salasyndaǵy birlesken jobalardy damytýǵa ýaǵdalasty. Premer-mınıstr Oljas Bektenov «Astana Mining & Metallurgy 2026» kongresi aıasynda Saýd Arabııasynyń ónerkásip jáne mıneraldyq resýrstar mınıstri Bandar ál-Hýraıfpen mańyzdy kezdesý ótkizdi. Bul týraly Úkimettiń baspasóz qyzmeti habarlady.
Saýd Arabııasy Qazaqstannyń Taıaý Shyǵystaǵy negizgi saýda-ekonomıkalyq seriktesteri qataryna kiredi. Qazaqstan men Saýd Arabııasy kóshbasshylarynyń ózara qoldaýy nátıjesinde senimdi ári dostyq qarym-qatynastar ornaǵany atap ótildi.
2025 jyldyń qorytyndysy boıynsha eki el arasyndaǵy ózara saýda kólemi 17%-ǵa artyp, $11,7 mln-dy qurady. Bıylǵy qańtar-sáýir aılarynda taýar aınalymy 2,9 esege ósip, $6,1 mln-nan asty. Keıingi 20 jylda Saýd Arabııasy Koroldiginen Qazaqstan Respýblıkasyna tartylǵan tikeleı sheteldik ınvestıtsııa kólemi $115,3 mln-dy qurady. Bıylǵy aqpan aıynda qol qoıylǵan Qazaqstan – Saýd Arabııasy úılestirý keńesin qurý týraly kelisim jáne ınvestıtsııalardy ózara yntalandyrý men qorǵaý týraly kelisim jańa birlesken bastamalardy júzege asyrý úshin qosymsha múmkindikter ashady.
Taý-ken metallýrgııa keshenindegi yntymaqtastyqty odan ári damytý máselelerine, sondaı-aq asa mańyzdy mıneraldar salasyndaǵy birlesken jobalardy júzege asyrý perspektıvalaryna nazar aýdaryldy. Paıdaly qazbalardy barlaý, óndirý jáne óńdeý, sondaı-aq qosylǵan quny joǵary óndiristerdi damytý salasyndaǵy ózara is-qımyl talqylandy.
Kezdesýge qatysýshylar taý-ken metallýrgııa jáne asa mańyzdy mıneraldar salasynda ekijaqty ózara is-qımyldy arttyrýǵa daıyn ekenderin rastady.
Budan buryn Qazaqstan men Qytaı ınnovatsııalyq qalalardy damytý baǵytynda yntymaqtastyqty kúsheıtetinin jazǵanbyz.
