Qazaqstan men Saýd Arabııasy arasyndaǵy áýe reısi 28-den 70-ke kóbeıdi
ASTANA. KAZINFORM — Qazaqstan men Saýd Arabııasy áýe qatynasyn júzege asyrý múmkindikterin keńeıtti. Bul týraly Kólik mınıstrligi habarlady.
Er-Rııad qalasynda (Saýd Arabııasy Koroldigi) Qazaqstan Úkimeti men Saýd Arabııasy Koroldiginiń Úkimeti arasyndaǵy Áýe qatynasy týraly kelisimge qol qoıý rásimi ótti. Qujatqa qol qoıý azamattyq avıatsııa salasyndaǵy qoldanystaǵy normatıvtik-quqyqtyq bazany nyǵaıtyp, eki el arasyndaǵy turaqty áýe qatynasyn odan ári damytýǵa qosymsha múmkindikter ashty.
Qol qoıý rásimine Qazaqstan Kólik vıtse-mınıstri Talǵat Lastaev jáne Saýd Arabııasy Koroldiginiń Azamattyq avıatsııa bas basqarmasy prezıdentiniń mindetin atqarýshy Sýleıman bın Ahmed Albassam qatysty.
Atalǵan kelisim saýda-ekonomıkalyq jáne iskerlik baılanystardy odan ári damytýǵa, ınvestıtsııalar tartýǵa, sondaı-aq týrıstik jáne mádenı yntymaqtastyqty nyǵaıtýǵa yqpal etedi. Qol jetkizilgen ýaǵdalastyqtar aıasynda taraptar turaqty reısterdiń ruqsat etilgen sanyn aptasyna 28 reısten 70 reıske deıin ulǵaıtty.
Qol jetkizilgen ýaǵdalastyqtar negizinde áýe tasymaldaýshylary Astana men Er-Rııad arasynda tikeleı turaqty reıster ashýdy, sondaı-aq Saýd Arabııasynyń basqa qalalaryna oryndalatyn baǵyttardyń sanyn arttyrýdy josparlap otyr.
Taıaýda Qazaqstannan qaı elderge jańa reıster ashylatynyn jazǵan edik.
