Qazaqstan men San-Marıno oıyny álemniń 36 elinde tikeleı efırde kórsetiledi
Fýtboldan 2024 jylǵy Eýropa chempıonatynyń irikteý kezeńi aıasynda búgingi Qazaqstan jáne San-Marıno kezdesýi álemniń 36 memleketinde tikeleı efırde kórsetiledi, dep habarlaıdy Kazinform.
Búgin, 17 qarashada elorda ýaqytymen 21:00-de «Astana-Arena» stadıonynda bastalatyn kezdesý Qazaqstan jáne Qazsport telearnalarynda tikeleı efırde kórsetiledi.
Sondaı-aq, oıyndy 36 eldiń turǵyndary tikeleı efırde tamashalaı alady.
Olardyń qatarynda AQSh, Qytaı, Meksıka, Ispanııa, Frantsııa, Indonezııa, Sıngapýr, Reseı, Túrkııa syndy memleketter bar.
El quramasy H tobynda synǵa túsedi. Týrnır kestesinde 8 oıynnan keıin 15 upaı jınap, úshinshi orynda tur.
Alǵashqy eki oryndaǵy Slovenııa men Danııanyń enshisinde 19 upaıdan bar.
Aldaǵy eki oıynda jeńiske jetken jaǵdaıda Qazaqstan quramasynyń qurlyqtyq doda fınaldyq satysyna shyǵýyna múmkindik týyp tur.
Eske salsaq, Qazaqstan men San-Marıno matchyna bılet tolyq satylyp ketti.
Sondaı-aq, atalǵan kezdesýde avstrııalyq tóreshiler brıgadasy qyzmet atqarady.
