Qazaqstan men Saha túrki halyqtarynyń túp-tórkini týraly tarıhı kıno túsirýi múmkin

ASTANA. QazAqparat - QR Premer-Mınıstri Álıhan Smaıylov pen Saha Respýblıkasynyń (ıAkýtııa) basshysy Aısen Nıkolaev saýda-ekonomıkalyq yntymaqtastyqty nyǵaıtý, ınvestıtsııalar tartý jáne mádenı-gýmanıtarlyq saladaǵy ózara is-qımyl máselelerin talqylady, dep habarlaıdy primeminister.kz.

Álıhan Smaıylov Qazaqstan men Reseı arasyndaǵy yntymaqtastyqty odan ári damytý sheńberinde mańyzdy mindetterdiń biri - ózara saýda kólemin ulǵaıtý ekenin atap ótti.

2022 jyldyń 11 aıynyń qorytyndysy boıynsha elder arasyndaǵy taýar aınalymy $24 mlrd-ty qurady, bul ótken jyldyń sáıkes kezeńimen salystyrǵanda 7%-ǵa artyq.

Premer-Mınıstrdiń aıtýynsha, mundaı qarqynmen aldaǵy jyldary bul kórsetkishti $30 mlrd-qa deıin jetkizýge múmkindik bar.

Bul rette ol ıAkýtııamen ózara taýar tasymalyn ulǵaıtý baǵytynyń áleýeti zor ekenin atap ótti.

2022 jylǵy qańtar-qarashada taýar aınalymy shamamen $80 mln-dy qurady, bul – ótken jylǵy kórsetkishten on ese joǵary.

Sondaı-aq Premer-Mınıstr ekijaqty qarym-qatynastyń mańyzdy bóligi mádenı-gýmanıtarlyq saladaǵy, atap aıtqanda kınematografııadaǵy ózara is-qımyl ekenin aıtty.

«Túrki halyqtarynyń túp-tórkini men qalyptasýy týraly birlesken tarıhı joba daıyndaýǵa bolady. Mundaı ımıdjdik jobany iske asyrý qoǵamnyń tarapynan Eýrazııanyń kóshpeli halyqtarynyń mádenıeti men tiline jáne tól murasyna degen qyzyǵýshylyqtaryn arttyrýǵa múmkindik beredi», — dedi ol.

Óz kezeginde Aısen Nıkolaev tsıfrlyq tehnologııalar salasynda, sondaı-aq ekonomıkanyń túrli baǵyttarynda jańa ınvestıtsııalyq jobalardy iske asyrýdyń múmkindigi joǵary ekenin aıtty.

Foto: primeminister.kz