Qazaqstan men Saha Respýblıkasy arasyndaǵy taýar aınalymy $160 mıllıonnan asty
ASTANA. KAZINFORM – Oljas Bektenov pen Saha Respýblıkasynyń basshysy Aısen Nıkolaev saýda-ekonomıkalyq yntymaqtastyq máselelerin talqylady, dep habarlady Úkimettiń baspasóz qyzmeti.
Qazaqstan Respýblıkasynyń Premer-Mınıstri Oljas Bektenov Qazaqstandaǵy Saha Respýblıkasy kúnderiniń ashylý saltanatyna qatysý úshin Astanaǵa saparmen kelgen Saha Respýblıkasynyń basshysy (ıAkýtııa) Aısen Nıkolaevpen kezdesti.
Saha Respýblıkasy Qazaqstan-Reseı saýda qatynastarynyń damýyna óz úlesin qosýda. Ózara saýda-ekonomıkalyq yntymaqtastyqty odan ári keńeıtý boıynsha Qazaqstan men Reseı prezıdentteri deńgeıinde qol jetkizilgen ýaǵdalastyqtardy iske asyrý barysy qaraldy.
Bir jyl ishinde Qazaqstan men Saha Respýblıkasy óńirleri arasyndaǵy taýar aınalymy 2 esege jýyq ósip, $160 mln-nan asty. Onyń 99%-dan astamy qazaqstandyq taýarlardyń eksportyna tıesili. Talqylaý barysynda ózara saýdanyń keń áleýeti atap ótildi jáne taraptardyń aýyl sharýashylyǵy, ónerkásip jáne IT salalaryndaǵy qarqyndy odan ári arttyra túsýge daıyn ekendigi aıtyldy.
Taraptar jetkiziletin taýarlar men qyzmetterdiń aýqymyn keńeıtý, isker toptar arasynda tikeleı baılanys ornatý boıynsha birlesken jumysty jandandyrý nıetin rastady. Qazaqstanda bes iri transshekaralyq saýda ortalyǵynyń, sonyń ishinde Reseımen shekaradaǵy «Eýrazııa» transshekaralyq saýda ortalyǵynyń iske qosylýy saýda-ekonomıkalyq qatynastarǵa jańa serpin beredi dep josparlanyp otyr.
Jıynda kreatıvti ındýstrııa jáne tsıfrlandyrý salasyndaǵy tájirıbe men tehnologııalar almasýǵa, sondaı-aq Qazaqstan men Saha Respýblıkasynyń ǵylymı-zertteý ınstıtýttary jáne bilim berý mekemeleri arasyndaǵy ózara is-qımyldy damytýǵa erekshe nazar aýdaryldy.
