Qazaqstan men Rýmynııa sottalǵan adamdardy ózara berý boıynsha bir-birine járdemdesetin bolady
ASTANA. QazAqparat - Búgin Parlament Senatynyń jalpy otyrysynda «Qazaqstan Respýblıkasy men Rýmynııa arasyndaǵy sottalǵan adamdardy berý týraly shartty ratıfıkatsııalaý týraly» zań jobasy maquldandy.
Qazaqstan Respýblıkasy men Rýmynııa arasyndaǵy adamdardy ustap berý týraly shartqa 2014 jylǵy 14 qarashada Býharestte qol qoıylǵan.
Shart Qazaqstan Respýblıkasy men Rýmynııa quzyretti organdarynyń arasyndaǵy qylmystyq qýdalaýdan jasyrynyp júrgen, sondaı-aq qylmystyq jazany óteýden jaltaryp júrgen adamdardy ustap berý máseleleri boıynsha qarym-qatynastardy retteýge jáne qylmysqa qarsy kúrestegi yntymaqtastyqtyń tıimdiligin arttyrýǵa baǵyttalǵan. Bul rette taraptar sottalǵan adamdardy berýge qatysty bir-birine barynsha múmkin bolatyndaı járdem kórsetýge mindetteledi. Úkim shyǵarýshy memleket nemese úkimdi oryndaýshy el azamattardy berýge bastama jasaı alady.
Sottalǵan adam ózi beriletin memlekettiń azamaty bolýy kerek. Sot úkimi kúshine engeni bolýy tıis. Sonymen qatar ondaı elder arasyndaǵy berýlerge sottalǵandardyń ózderi de kelisim berýleri qajet. Shartta adamdy berýden bas tartý negizderi aıqyndalǵan. Sonymen birge taraptardyń árqaısysy óz ulttyq zańnamalaryna sáıkes keshirim, raqymshylyq jasaýdy nemese jazany jeńildetýdi júzege asyrady.
Toqtala ketetin jaıt, Qazaqstan buǵan deıin osyndaı sharttardy Ázerbaıjan, Túrkimenstan, Ýkraına, Qytaı, Túrkııa, Ispanııa, Italııa sekildi memlekettermen jasaǵan.
