Qazaqstan men Rýmynııa saýda-ınvestıtsııalyq áleýetin ashý úshin jańa qadam jasady

NUR-SULTAN. QazAqparat - Qazaqstan-Rýmynııa saýda-ekonomıkalyq jáne ǵylymı-tehnıkalyq yntymaqtastyq jónindegi úkimetaralyq komıssııasy tarıhynda alǵash ret otyrys vıdeokonferentsııa formatynda ótti, dep habarlaıdy QazAqparat tilshisi.

Qazaqstannyń Rýmynııadaǵy elshiliginiń málimetinshe, otyrysta Qazaqstan tarapynan úkimetaralyq komıssııaǵa QR Ekologııa, geologııa jáne tabıǵı resýrstar mınıstri Maǵzum Myrzaǵalıev, al Rýmynııa tarapynan sol eldiń Energetıka jáne iskerlik orta mınıstri Vırdjıl-Danıel Popeský tóraǵalyq etti.

Kelissóz qorytyndysynda úkimetaralyq komıssııanyń 15-otyrysynyń hattamasyna qol qoıyldy. Qujattyń rásimdelýine ózara is-qımyldyń keń aýqymdy máseleleri boıynsha belsendi túrde júrgizilgen kelissózder sep boldy.

Atap aıtqanda, energetıka, qorshaǵan ortany qorǵaý, jeńil jáne aýyr ónerkásip, qurylys, aýyl sharýashylyǵy, bilim berý, kólik jáne farmatsevtıka syndy basym baǵyttardy jandarý ýaǵdalastyǵyna qol jetkizildi.

Buǵan qosa, saýda baılanystaryn jáne ózara ınvestıtsııa tartýdy belsendi túrde keńeıtýdiń aıryqsha mańyzdylyǵy atalyp ótildi.