Qazaqstan men Rýmynııa ekijaqty yntymaqtastyqty nyǵaıtpaq
BÝHAREST. QazAqparat - Qazaqstan men Rýmynııa aqparattyq tehnologııalar, ınnovatsııa jáne agroındýstrııa salalarynda ózara árekettestikti keńeıtip, ekijaqty qarym-qatynastardyń barlyq spektri boıynsha yntymaqtastyqty kúsheıtýge múddeli.
Bul másele QR Syrtqy ister mınıstriniń orynbasary Roman Vasılenkonyń bıylǵy jyldyń 14-16 jeltoqsany aralyǵynda Rýmynııaǵa jasaǵan saparynyń mańyzdy bóligi boldy, dep habarlaıdy QazAqparat QR Syrtqy ister mınstrliginiń bspasóz qyzmetine silteme jasap.
Sapar sheńberindegi is-sharalar eki eldiń asa maǵynaly oqıǵalary aıasynda ótti. Qazaqstanda Elbasynyń bıylǵy jyldyń 5 qazandaǵy «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýynda baıandalǵan bastamalardy júzege asyrý boıynsha aýqymdy jumystar óris alsa, Rýmynııada 2018 jyly 1 jeltoqsanda rýmyn jerleri birigýiniń 100-jyldyǵyna arnalǵan mereıtoılar endi ǵana aıaqtaldy.
Bul oqıǵalar Rýmynııadaǵy jergilikti resmı jáne isker toptary, sondaı-aq buqaralyq aqparat quraldary ókilderimen kezdesýlerde jan-jaqty kóterildi.
Sapar barysynda Rýmynııa Parlamenti Depýtattar Palatasy Tóraǵasynyń orynbasary Florın Iordakemen kezdesý ótti. Onyń barysynda sońǵy jyldardaǵy parlamentaralyq yntymaqtastyqtyń damýynyń joǵary deńgeıi atalyp ótti. Osy yntymaqtastyqty odan ári nyǵaıtýǵa jáne 2019 jyly «Qazaqstan-Rýmynııa» parlamentaralyq dostastyq tobynyń tóraǵasy Baqytjan Ertaevtyń basshylyǵymen Parlament Májilisi delegatsııasynyń Býharest qalasyna saparyn uıymdastyrýǵa ekijaqty umtylys bildirildi.
Rýmynııa Úkimeti múshelerimen birqatar kezdesýler ótkizildi. Aýyl sharýashylyǵy mınıstri Petrý Daıamen aǵymdaǵy ahýal jáne agroónerkásiptik keshen salasyndaǵy yntymaqtastyqty damytý perspektıvalary talqylandy. Taraptar 2019 jyldyń ekinshi jartysynda P.Daıanyń Qazaqstanǵa saparyn ótkizýge, sondaı-aq QR jáne Rýmynııa Aýyl sharýashylyǵy mınıstrlikteri arasynda yntymaqtastyq týraly kelisimderdi pysyqtaýǵa ýaǵdalasty.
R. Vasılenko Rýmynııanyń Kommýnıkatsııalar jáne aqparattyq qoǵam mınıstri Aleksandrý Petreskýmen aqparattyq tehnologııalar jáne tsıfrlandyrý salasyndaǵy ózara árekettestikti keńeıtý múmkindikterin talqylady. Kezdesý barysynda rýmyn saıasatkeri óziniń qazaqstandyq áriptesi, QR Aqparat jáne kommýnıkatsııalar mınıstri Dáýren Abaevqa 2019 jyly Býharest qalasyna kelýge shaqyrdy. Sonymen qatar, taraptar aqparattyq tehnologııalar salasynda yntymaqtastyq týraly ekijaqty kelisimge qol qoıýdy pysyqtaýǵa ýádelesti.
15 jeltoqsanda qazaqstandyq delegatsııa Transılvanııanyń eń iri qalasy Klýj-Napokaǵa baryp, Qazaqstan men Rýmynııa óńirleri arasyndaǵy baılanystardy damytý perspektıvalaryn talqylaý úshin Klýj ýezdiniń Prefekti Ioan Kerekeshpen kezdesý ótkizdi. Klýj jáne Mýresh ýezderiniń isker toptarymen kelissózder aıasynda, R. Vasılenko jergilikti iskerlik qoǵamdastyqty QR ınvestıtsııalyq ahýaly jáne áleýetimen tanystyryp, rýmyn kásipkerlerin Qazaqstan naryǵyn ıgerýge jáne shetel ınvestorlaryna usynylatyn qarjylyq jáne salyqtyq jeńildikterdi paıdalanýǵa shaqyrdy.
Sondaı-aq qazaqstandyq dıplomattar Ońtústik-Shyǵys Eýropadaǵy eń iri aqparattyq tehnologııalardy damytý ortalyqtarynyń biri bolyp tabylatyn Klýj-Napoka qalasynyń IT-klasteri qyzmetimen tanysty. Klaster basshylyǵymen kezdesý nátıjesinde Rýmynııaǵa qazaqstandyq IT-hab basshylyǵynyń saparyn jáne Yntymaqtastyq týraly memorandýmǵa qol qoıýdy uıymdastyrýdy qosa alǵanda, «Astana Hub» halyqaralyq tehnoparkimen birlesken is-sharalar ótkizý týraly ýaǵdalastyqqa qol jetkizildi.
Sol kúni QR Qurmetti konsýldyǵynda Klýj-Napoka qalasynyń túrli ýnıversıtetterinde oqıtyn qazaqstandyq stýdenttermen ótken kezdesýde aqparattyq tehnologııalardyń damý keleshegi jáne jastardyń osy úrdisterge qatysýy jaıy qyzý talqylandy.
Sonymen birge, R. Vasılenko óńirdiń jetekshi buqaralyq aqparat quraldarynyń biri «Aktýal de Klýj» gazetine suhbat berip, onyń barysynda saýda-ekonomıkalyq jáne óńiraralyq yntymaqtastyqty keńeıtý, sonyń ishinde 2017 jyly Klýj-Napoka men Qaraǵandy qalalary arasynda yntymaqtastyq týraly kelisimdi júzege asyrý aıasyndaǵy keleshegin sýrettedi.
