Qazaqstan men Rýmynııa arasynda qatynaıtyn áýe reısteriniń sany artady
Bul týraly QazAqparat QR Indýstrııa jáne ınfraqurylymdyq damý mınıstrliginiń baspasóz qyzmetine silteme jasap habarlaıdy.
Kezdesýge sondaı-aq Azamattyq avıatsııa komıtetiniń tóraǵasy Talǵat Lastaev, Rýmynııanyń Azamattyq avıatsııa basqarmasynyń bas dırektory Nıkol Stoıka jáne «Qazaqstannyń avıatsııalyq ákimshiligi» AQ Bas dırektory Katalın Radý qatysty.
Kezdesý barysynda taraptar áýe, kólik, temir jol jáne teńiz salalaryndaǵy birqatar máselelerdi talqylap, barlyq kólik túrleri boıynsha yntymaqtastyqty odan ári damytýǵa daıyn ekendikterin bildirdi. Sondaı-aq qozǵalǵan máseleler boıynsha saraptamalyq jumys toptaryn qurýǵa kelisti.
Azamattyq avıatsııa komıtetiniń tóraǵasy T. Lastaev jáne Rýmynııanyń Kólik jáne ınfraqurylym mınıstrliginiń Memlekettik hatshysy B.Mındreský Qazaqstan men Rýmynııa avıatsııalyq bılik oryndarynyń arasyndaǵy ózara túsinistik týraly memorandýmǵa qol qoıdy. Qujatqa sáıkes eki eldiń áýekompanııalaryna eki el arasynda ár taraptan ushaqtyń kez-kelgen túrinde aptasyna 14 reıs oryndaý quqyǵy berildi (7 jolaýshy jáne 7 júk áýe kemesi).
Sondaı-aq, «ashyq aspan» rejımi aıasynda qazaqstandyq tarap rýmyn tarapyna Qazaqstanǵa ushýlardy 5 dárejeli «aýa erkindigin» paıdalana otyryp jasaýdy usyndy.
Máselen, 2020 jyldyń basynda rýmyndyq «Blue Air» avıakompanııasy Býharest – Nur-Sultan baǵyty boıynsha ushýlardy bastaýdy josparlaǵan bolatyn. Alaıda, koronavırýs ınfektsııasynyń taralýyna baılanysty Býharest - Nur-Sultan baǵyty boıynsha reıstiń ashylýy belgisiz merzimge qaldyrylǵan bolatyn.
Sonymen qatar, Rýmynııanyń Azamattyq avıatsııa basqarmasynyń bas dırektory Nıkol Stoıka men «Qazaqstannyń avıatsııalyq ákimshiligi» AQ Katalın Radý Tehnıkalyq yntymaqtastyq týraly kelisimge qol qoıdy.
«Kezdesý qorytyndysy boıynsha Taraptar Qazaqstan men Rýmynııa arasyndaǵy tikeleı turaqty reısterdi iske qosýǵa baılanysty jumystardy jalǵastyrýǵa kelisti»,-delingen habarlamada.
