Qazaqstan men Rýanda tsıfrlandyrý máselelerine qatysty ortaq jobalardy qolǵa alady
ASTANA. KAZINFORM – Qazaqstan men Rýanda tsıfrlandyrý jáne kıberqaýipsizdik máselelerine qatysty ortaq jobalardy qolǵa alady. Bul týraly Aqordada Rýanda Prezıdenti Pol Kagamemen kelissózderden keıingi birlesken málimdeme barysynda Memleket basshysy Qasym-Jomart Toqaev aıtty.
— Kelissóz barysynda azyq-túlik qaýipsizdigin qamtamasyz etý máselesin pysyqtadyq. Qazaqstannyń aýyl sharýashylyǵy ónimderin Afrıka qurylyǵyna tasymaldaý joldaryn qarastyrdyq. Elimiz ozyq tehnologııalar, jasandy ıntellekt jáne ǵarysh salasynda aıtarlyqtaı tájirıbe jınaqtady. Biz tsıfrlandyrý jáne kıberqaýipsizdik máselelerine qatysty ortaq jobalardy qolǵa alamyz dep kelistik. Ǵarysh keńistigin birlesip ıgerý jóninde ýaǵdalastyqqa qol jetkizdik, — dedi Prezıdent.
Memleket basshysynyń paıymynsha, mundaı qadam memlekettik qyzmet pen bıznestiń tıimdiligin arttyrýǵa septigin tıgizedi.
— Aqparattyq qaýipsizdik kúsheıtýge múmkindik beredi. Qazaqstan men Rýanda jasyl energetıka salasyn órkendetip, tabıǵı resýrstardy tıimdi paıdalanýǵa múddeli. Osyǵan oraı birlesken jobalardy júzege asyrýǵa nıettimiz bul ýaǵdalastyqtar saýda-sattyq kólemin arttyrýǵa jol ashady. Sonymen qatar eki eldiń ınvestıtsııalyq yqpaldastyǵyna tyń serpin beredi, — dedi Qasym-Jomart Toqaev.
Aıta keteıik, Qazaqstan men Rýanda kólik-logıstıka jáne saýda salasynda birlesken jumys toptaryn qurýǵa kelisti.