Qazaqstan men Rýanda Prezıdentteri birqatar saladaǵy qarym-qatynasty damytý máselesin talqylady

ASTANA. QazAqparat – Aqordada Memleket basshysy Qasym-Jomart Toqaev Rýanda Prezıdenti Pol Kagamemen kelissóz júrgizdi.

Kezdesý barysynda Qasym-Jomart Toqaev Pol Kagamege iltıpat bildirip, bul sapardyń tarıhı máni zor dep baǵalady. Sondaı-aq Qazaqstan men Rýanda arasyndaǵy qarym-qatynas jańa deńgeıge shyǵatynyn jetkizdi.

– Sizdiń bul saparyńyz jáne aldaǵy kelissózder ekijaqty yqpaldastyqqa tyń serpin berý turǵysynan óte mańyzdy dep oılaımyn. Rýandanyń ekonomıkasy qarqyndy damyp keledi. Menińshe, ózara baılanystardy nyǵaıta berý qajet. Óıtkeni Qazaqstan – ІJÓ kólemi, ІT tehnologııalar men jasandy ıntellektini damytý boıynsha óńirdegi kóshbasshy el. Bul bizdiń ózara tıimdi yntymaqtastyǵymyzdy órkendetýdiń basym baǵyttary bola alady. Sondyqtan Sizdiń saparyńyzǵa erekshe mán beremin, – dedi Qasym-Jomart Toqaev.

Rýanda Prezıdenti Memleket basshysyna qonaqjaılyq tanytqany úshin alǵys aıtyp, ekijaqty yntymaqtastyqty damytýǵa nıetti ekenin jetkizdi.

– Elińizge shaqyrǵanyńyz úshin rızashylyǵymdy bildiremin. Men buǵan deıin Qazaqstanǵa 2015 jyly kelgen bolatynmyn, bul meniń ekinshi saparym. Ózińizben jáne Sizdiń komandańyzben birge eki el ıgiligi jolyndaǵy birlesken jumysymyzdy jalǵastyrýdyń múmkindikterin qarastyramyz, – dedi Pol Kagame.

Taraptar Qazaqstan men Rýandanyń saıası, saýda-ekonomıkalyq, kólik-logıstıka, aýyl sharýashylyǵy jáne tsıfrlandyrý salalaryndaǵy qarym-qatynastaryn damytý perspektıvasyn talqylady. Sondaı-aq Prezıdentter aımaqtyq jáne halyqaralyq máseleler týraly pikir almasty.

Buǵan deıin Memleket basshysy Qasym-Jomart Toqaev Aqordada Qazaqstanǵa resmı saparmen kelgen Rýanda Prezıdenti Pol Kagameni qarsy alǵanyn jazǵan edik.