Qazaqstan men Rýanda birlesken ǵylymı zertteýler júrgizýge kelisti

ASTANA. KAZINFORM — Qazaqstan men Rýanda birlesken ǵylymı zertteýler júrgizýge kelisti. Bul týraly Aqordada Rýanda Prezıdenti Pol Kagamemen kelissózderden keıingi birlesken málimdeme barysynda Memleket basshysy Qasym-Jomart Toqaev aıtty.

— Búginde Astana men Kıgalıdiń halyqaralyq qarjy ortalyqtary arasynda tyǵyz baılanys bar. Biz jahandyq qarjy naryǵyndaǵy osy baılanysty odan ary nyǵaıtýǵa kelistik. Klımattyń ózgerýine qarsy kúres jáne qorshaǵan ortany qorǵaý máseleleri de nazardan tys qalǵan joq. Rýandanyń klımatty saqtaý baǵytynda mol tájirıbesi bar. Sonyń arqasynda jahandyq jobalarǵa zor úles qosyp keledi. Osy rette tájirıbe almasýdyń ózekti ekenin atap óttik, — dedi Prezıdent.

Memleket basshysy halyqaralyq konventsııalar men kelisimder aıasynda ekologııa máselelerin sheshý úshin kúsh biriktirý joldary talqylanǵanyn da atap ótti.

— Sonymen birge mádenıet, bilim, ǵylym salasyndaǵy yntymaqtastyqqa erekshe nazar aýdardyq. Akademııalyq baılanysty damytýǵa, stýdent almasýǵa, sondaı-aq birlesken ǵylymı zertteýler júrgizýge kelistik. Mádenı-gýmanıtarlyq baılanysty nyǵaıtýǵa ýaǵdalastyq, — dedi Qasym-Jomart Toqaev.

Aıta keteıik, Memleket basshysy mártebeli meımanmen shaǵyn jáne keńeıtilgen quram kelisssózder júrgizdi.