Qazaqstan men Rýanda kólik-logıstıka jáne saýda salasynda birlesken jumys toptaryn qurýǵa kelisti
ASTANA. KAZINFORM — Qazaqstan men Rýanada kólik-logıstıka jáne saýda salasynda birlesken jumys toptaryn qurýǵa kelisti. Bul týraly Aqordada Rýanda Prezıdenti Pol Kagamemen kelissózderden keıingi birlesken málimdeme barysynda Memleket basshysy Qasym-Jomart Toqaev aıtty.
— Qazaqstan osy aımaqtaǵy eldermen tyǵyz qarym-qatynas ornatýǵa erekshe mán berip otyr. Biz Rýandany Afrıkadaǵy senimdi seriktesimizdiń birin retinde qarastyramyz. Sondaı-aq ózara áriptestikti odan ári nyǵaıtýǵa múddelimiz. Búgingi kezdesý mazmundy ári maǵynaly boldy. Biz eki jaqty yntymaqtastyqty kúsheıtý joldaryn talqyladyq. Naqty kelisimderge qol jetkizdik. Eki el arasyndaǵy saıası dıalogty damytýǵa ýaǵdalastyq. Aldaǵy ýaqytta Syrtqy ister mınıstrlikteri joǵary deńgeıdegi kezdesýler ótkizetin boldy, — dedi Memleket basshysy.
Sonymen qatar Memleket basshysy bıyl sáýir aıynda Qazaqstan men Rýanda dıplomatııalyq jáne qyzmettik tólqujat ıelerin vızalyq talaptardan bosatýǵa keliskenin eske saldy.
— Muny rızashylyqpen atap ótkim keledi. Búgingi kezdesýde parlamentaralyq dıplomatııa máselesin de pysyqtadyq. Onyń áleýetin barynsha paıdalaný qajet. Sondaı-aq biz kólik-logıstıka jáne saýda salasynda birlesken jumys toptaryn qurýǵa kelistik. Sol arqyly saýda-ekonomıkalyq qatynastardy odan ary damytýǵa bolady. Bul rette halyqaralyq dálizderdiń múmkindigin talqyladyq, — dedi Qasym-Jomart Toqaev.
Buǵan deıin habarlanǵandaı, Qazaqstan Afrıka elderimen baılanysty kúsheıtýge basa mán beredi.