Qazaqstan men «Rosatom» alǵashqy AES jobasy boıynsha kelisim jasady
ASTANA. KAZINFORM — Vladıvostok qalasynda ótip jatqan XI Shyǵys ekonomıkalyq forýmy aıasynda Qazaqstan Respýblıkasynda atom elektr stantsııasyn jobalaý, jabdyqtaý jáne salý jónindegi kelisimshartqa qol qoıyldy.
Qujatqa «Qazaqstan atom elektr stantsııalary» JShS men «Rosatom» memlekettik atom energııasy korporatsııasynyń enshiles kásiporny — «Atomstroıeksport» AQ arasynda qol qoıyldy.
Kelisimshartqa qol qoıý rásimi Qazaqstan Respýblıkasy Atom energııasy jónindegi agenttiginiń tóraǵasy Almasadam Sátqalıev pen «Rosatom» memlekettik korporatsııasynyń bas dırektory Alekseı Lıhachevtyń qatysýymen ótti.
Kelisimshartqa qol qoıý Qazaqstandaǵy alǵashqy AES qurylysy jobasynyń jańa praktıkalyq kezeńge ótkenin bildiredi.
2026 jylǵy 28 mamyrdaǵy úkimetaralyq kelisimge sáıkes, taraptar belgilengen rásimderdi, sonyń ishinde Qazaqstan Respýblıkasynyń Úkimetimen qajetti kelisýdi júzege asyrýǵa kirisedi.
— AES jobasyn iske asyrý el úshin strategııalyq mańyzǵa ıe. Ekonomıkanyń, ónerkásiptiń, ınfraqurylymnyń, tsıfrlandyrýdyń jáne jasandy ıntellektiniń damýyna baılanysty Qazaqstannyń senimdi ári turaqty elektr energııasyna degen qajettiligi kezeń-kezeńimen arta túsedi.
Atom energetıkasy aldaǵy onjyldyqtar boıy turaqty bazalyq elektr energııasyn óndirýdi qamtamasyz etýge múmkindik beredi. Sonymen qatar jobany iske asyrý otandyq ónerkásipti damytýǵa, ozyq tehnologııalardy engizýge jáne joǵary bilikti kadrlardy daıarlaýǵa qosymsha múmkindikter beredi, — delingen habarlamada.
AES qurylysy Qazaqstannyń energetıkalyq qaýipsizdigi men táýelsizdigin nyǵaıtýǵa, ónerkásiptik jáne tehnologııalyq áleýetin damytýǵa, kadrlyq rezerv qalyptastyrýǵa jáne eldiń tehnologııalyq egemendigin nyǵaıtýǵa baǵyttalǵan uzaq merzimdi saıasatynyń mańyzdy bóligi.
— Alǵashqy AES qurylysy jobasyn iske asyrý barysynda jergilikti qamtýǵa — qazaqstandyq kásiporyndardy, mamandardy, taýarlardy, jumystar men kórsetiletin qyzmetterdi barynsha tartýǵa erekshe nazar aýdarylady. Alǵashqy AES qurylysy otandyq ónerkásipti damytýǵa, jańa óndirister men tehnologııalardy ıgerýge, sondaı-aq atom energetıkasyn odan ári damytý úshin ulttyq quzyretterdi qalyptastyrýǵa serpin berýge tıis, — delingen agenttik habarlamasynda.
Jobany iske asyrý turaqty ekonomıkalyq ósimniń uzaq merzimdi negizin qalyptastyryp, Qazaqstannyń zamanaýı atom salasyn damytýdaǵy negizgi kezeńderdiń birine aınalady.
Aıta ketelik AES kadrlaryn daıarlaý maqsatynda Qazaqstan men «Rosatom» yntymaqtastyqty kúsheıtetini týraly jazǵan edik.
