Qazaqstan men Reseıge qatysty feık aqparat jıiledi - SІM
ASTANA. KAZINFORM – Syrtqy ister mınıstrliginiń resmı ókili Aıbek Smadııarov Qazaqstan men Reseıge qatysty feık aqparattar jıilep ketkenin aıtty.
«Keıingi kezderi Qazaqstanǵa qatysty aqparattyq shabýyl kóbeıip ketti. Árıne, onyń bári Qazaqstan men Reseıdiń arasyndaǵy dostyq qarym-qatynasty buzýǵa baǵyttalǵan. Máselen, Tatarstandaǵy obektilerdi Qazaqstannan ushyrylǵan drondar atqylady degen qaýeset boldy. Oǵan qosa, Qazaqstan Reseıdiń qarý-jaraǵan Ýkraınaǵa satyp jatyr degen aqparat jarııalandy. Munyń bári jalǵan málimet. Ony birden Qazaqstannyń Qorǵanys mınıstrligi osynyń bárin jalǵan aqparat ekenin jarııalady. Biz mundaı aqparattyq shabýylǵa qarsy Reseılik tarappen birlesip, jumys istep jatyrmyz. Barlyq deńgeıde baılanys ornatylǵan», - dedi dedi A.Smadııarov vedomstvodaǵy aptalyq baspasóz máslıhatynda.
Bul turǵyda ol «úshinshi kúshter» jalǵan málimetterdi paıdalanyp, ózderiniń áreketterin istep jatqanyn aıtty.
«Osydan 2 kún buryn jasandy ıntellektini paıdalanyp, Memlekettik dýmanyń depýtaty Andreı Gýrýlevtiń daýysymen Qazaqstanǵa qarsy taǵy jaman sózder aıtqyzdy. Bul depýtat áleýmettik jelilerde vıdeo túsirip, bul aqparattyń jalǵan ekenin málimdedi. Osynyń bárin eskerip, biz Reseıdiń barlyq deńgeıdegi memlekettik organdarymen tikeleı baılanys ornattyq. Sonyń arqasynda biz jaǵymsyz áreketterge tıimdi qarsy tura alamyz. Osyǵan baılanysty barlyq azamat pen BAQ ókiline tek resmı aqparat kózderine senýge, paıdalanýǵa shaqyramyz», - dedi resmı ókil.
Budan buryn habarlanǵandaı, jaqynda QR Qorǵanys mınıstrligi Tatarstannyń Elabýga jáne Nıjnekamsk qalalaryndaǵy kásiporyndarǵa jasalǵan dron shabýylyna Qazaqstannyń qatysy joq ekenin málimdedi.
