Qazaqstan men Reseıdiń Lenıngrad oblysynyń taýar aınalymy 257,9 mln dollarǵa jetti
ASTANA. KAZINFORM- Qazaqstan men Reseıdiń Lenıngrad oblysy ózara saýdany keńeıtý, birlesken óndiristerdi damytý jáne kólik logıstıkasy salasyndaǵy yntymaqtastyqty nyǵaıtý máselelerin talqylady. Bıylǵy segiz aıda Qazaqstannyń Lenıngrad oblysymen taýar aınalymy 2,5%-ǵa ósip, 257,9 mln AQSh dollaryna jetti.
Qazaqstan Premer-mınıstriniń orynbasary – ulttyq ekonomıka mınıstri Serik Jumanǵarın Reseıdiń Lenıngrad oblysynyń gýbernatory Aleksandr Drozdenkomen kezdesti, dep habarlaıdy Úkimettiń baspasóz qyzmeti. Kezdesýde aýyl sharýashylyǵy men ónerkásiptegi yntymaqtastyqtyń perspektıvalary da qaraldy.
Taraptar agroónerkásip keshenin bolashaǵy zor yntymaqtastyq baǵyttarynyń biri retinde atap ótti. Qazaqstan sút baǵytyndaǵy mal sharýashylyǵy, selektsııa, azyq-túlik óndirisi jáne aýyl sharýashylyǵy ónimderin óńdeý salalarynda birlesken jobalardy damytýǵa múddeli. Lenıngrad oblysynyń osy baǵyttardaǵy tájirıbesi kooperatsııany keńeıtýge jáne shıkizatty qaıta óńdeý kólemin arttyrýǵa negiz bola alady.
Ónerkásiptik kooperatsııa men óndiristerdi jergiliktendirýge erekshe nazar aýdaryldy. Mashına jasaý, hımııa ónerkásibi, jabdyqtar men qurylys materıaldaryn óndirý salalarynda birlesken jobalardy iske asyrý áleýeti talqylandy. Sondaı-aq Jambyl oblysynda mıneraldy tyńaıtqyshtar óndirýge arnalǵan shıkizat jetkizý jáne zamanaýı organıkalyq tyńaıtqyshtar shyǵarý jobasy qarastyryldy.
Kólik logıstıkasy da mańyzdy taqyryptardyń biri boldy. Aleksandr Drozdenko Lenıngrad oblysynyń porttary arqyly qazaqstandyq júkterdi tasymaldaýǵa arnalǵan uzaq merzimdi kelisimsharttar jasaýǵa múddeli ekenin atap ótti. Taraptar temirjol tranzıti máselelerin jáne júk tasymalynyń turaqtylyǵyn arttyrý qajettigin talqylady.
Budan bólek, atom salasyndaǵy yntymaqtastyq perspektıvalary, onyń ishinde osy salaǵa mamandar daıarlaý máselesi qaraldy.
Serik Jumanǵarın qol jetkizilgen kelisimderden naqty jobalardy iske asyrýǵa kóshýdiń mańyzdylyǵyn atap ótip, eki óńirdiń kásiporyndary arasyndaǵy tikeleı baılanystardy jandandyrýdy usyndy.
-Bizdiń mindetimiz – ózara saýdany keńeıtý, birlesken óndiristerdi damytý jáne eki tarapqa da naqty paıda ákeletin bastamalardy júzege asyrý úshin jaǵdaı jasaý, – dep atap ótti Qazaqstan Premer-mınıstriniń orynbasary.
Osyǵan deıin Qazaqstan men Reseı elektrondy júkqujat arqyly júk tasymaldaýǵa kóshetini týraly jazdyq.
