Qazaqstan men Reseıdiń birlesken ónerkásiptik jobalary 52,7 mlrd dollarǵa jetti
ASTANA. KAZINFORM — Qazaqstan Respýblıkasy Ónerkásip jáne qurylys vıtse-mınıstri Oljas Saparbekov Omby qalasynda ótken Qazaqstan men Reseıdiń óńiraralyq yntymaqtastyǵynyń XXII forýmy aıasynda uıymdastyrylǵan «Ónerkásiptik kooperatsııa – Qazaqstan men Reseıdiń ornyqty damýynyń faktory» atty paneldik sessııaǵa qatysty.
Sessııa barysynda Qazaqstan men Reseı arasyndaǵy ónerkásiptik yntymaqtastyqtyń negizgi kórsetkishteri, birlesken ınvestıtsııalyq jobalar, ınvestorlardy memlekettik qoldaý sharalary jáne ónerkásiptik kooperatsııany damytý tetikteri tanystyryldy.
Reseı Qazaqstan ekonomıkasyna ınvestıtsııa salatyn eń iri úsh eldiń qataryna kiredi. 2025 jyldyń qorytyndysy boıynsha Reseıden tartylǵan tikeleı ınvestıtsııalar kólemi $2,9 mlrd. Al 2005 jyldan beri tartylǵan ınvestıtsııalardyń jıyntyq kólemi shamamen $29 mlrd-qa jetti.
Qazaqstan men Reseı arasyndaǵy ónerkásiptik kooperatsııa qorjynynda jalpy quny $52,7 mlrd bolatyn, shamamen 60 myń jumys ornyn ashýǵa múmkindik beretin 177 birlesken joba bar. Onyń ishinde jalpy quny $22,4 mlrd bolatyn 122 joba qazirdiń ózinde iske asyryldy.
Sondaı-aq jıynda ınvestorlardy memlekettik qoldaýdyń qoldanystaǵy sharalary, onyń ishinde arnaıy ekonomıkalyq jáne ındýstrııalyq aımaqtardyń múmkindikteri, Eýrazııalyq ekonomıkalyq odaq aıasyndaǵy birlesken jobalardy qarjylandyrý tetigi qarastyryldy.
Aıta ketelik Prezıdent HHІІ Qazaqstan–Reseı óńiraralyq yntymaqtastyq forýmyna qatysady.
