Qazaqstan men Reseıdiń bıznes sýbektileriniń quny $26,5 mlrd – Oljas Bektenov
ASTANA. KAZINFORM – Qazaqstan Respýblıkasynyń Premer-Mınıstri Oljas Bektenov Reseı Federatsııasy Úkimetiniń tóraǵasy Mıhaıl Mıshýstınniń shaqyrýymen Máskeýge jumys saparymen bardy. Bul týraly Premer-Mınıstrdiń saıty jazdy.
Kelissózder barysynda úkimetter basshylary aǵymdaǵy saýda-ekonomıkalyq yntymaqtastyq máselelerin jáne Qazaqstan Respýblıkasynyń Prezıdenti Qasym-Jomart Toqaev pen Reseı Federatsııasynyń Prezıdenti Vladımır Pýtın arasynda jasalǵan ýaǵdalastyqtardyń iske asyrylý barysyn talqylady.
Taraptar saýda jáne ınvestıtsııa, ónerkásip kooperatsııasy, energetıka, aýyl sharýashylyǵy, azamattyq avıatsııa, sondaı-aq tranzıttik-kólik salalaryndaǵy birlesken is-qımyldardy aıqyndady. Sonymen qatar mádenı-aǵartý salasyndaǵy ózara is-qımyl máseleleri talqylandy.
Oljas Bektenov ónerkásip kooperatsııasyn nyǵaıtý jáne saýda-sattyqtaǵy ózara is-qımylyn damytýdyń oń qarqynyn atap ótti.
Qazirgi tańda eki eldiń bıznes sýbektileri quny $26,5 mlrd bolatyn 135 jobany iske asyrýda.
Sonymen qatar ekonomıkanyń negizgi salalarynda, atap aıtqanda, mashına jasaý, metallýrgııa jáne hımııa ónerkásibinde jalpy quny $14 mlrd-ty quraıtyn qosymsha 67 birlesken joba pysyqtalýda.
Birlesken kúsh-jigerdiń arqasynda 11 myńnan astam jumys orny ashylmaq.
«Elderimiz arasyndaǵy qarym-qatynastar jáne mádenı yntymaqtastyqtyń barlyq spektri boıynsha jemisti damyp keledi. Mańyzdy baǵyt – ónerkásip kooperatsııasy. Ol qazirdiń ózinde ózara tabysty ekijaqty is-qımyldyń naqty kórinisine aınalyp otyr. Eki el úkimetteri elderimizdiń kóshbasshylary qol jetkizgen barlyq ýaǵdalastyqtardy iske asyrý úshin bar kúsh-jigerin salady», — dedi Qazaqstan Premer-Mınıstri Oljas Bektenov.
QR Úkimetiniń basshysy Qazaqstan-Reseı memlekettik shekarasyndaǵy ótkizý beketterin jańǵyrtý jumystaryn jedeldetý jáne úılestirý qajettigin atap ótti.
Kezeńdi jumys sheńberinde 2027 jyldyń sońyna deıin jumys kólemin eskere otyryp aıqyndalǵan 30 ótkizý beketiniń 29-y kúrdeli jóndeýden ótedi.
Atalǵan sharalar tranzıtti jeńildetýge jáne jalpy shekara boıynda ótkizý qabiletin arttyrýǵa múmkindik beredi.
Sondaı-aq «Soltústik – Ońtústik» halyqaralyq dáliziniń áleýetin keńeıtýge, «Qazaqstan – Túrkimenstan – Iran» temirjol ýchaskesin qarqyndy paıdalana otyryp, kólik arterııasyn damytýǵa basa nazar aýdaryldy.
Sonymen qatar qazaqstandyq tarap aýyl sharýashylyǵy ónimderin tereń óńdeýge basymdyq bere otyryp, AÓK salasyndaǵy yntymaqtastyqty jandandyrýdyń perspektıvti baǵyttaryn atap ótti.
