Qazaqstan men Reseıdiń aýyl sharýashylyǵy boıynsha saýda kólemi qańtarda 6,6%-ǵa ósken
ASTANA. KAZINFORM – Bul týraly búgin Astanada Aýyl sharýashylyǵy mınıstri Aıdarbek Saparovtyń Reseı Federatsııasynyń Aýyl sharýashylyǵy mınıstri Oksana Lýtpen jumys kezdesýi barysynda aıtyldy, dep habarlaıdy QR AShM baspasóz qyzmeti.
Baspaóz qyzmetiniń málimetterine qaraǵanda, basqosýǵa eki eldiń beıindi qurylymdary ókilderi de qatysty.
Oksana Lýt Qazaqstanǵa kelissózder júrgizý maqsatynda qatarynan ekinshi jyl kelip otyr. Bul kórshiles elder tarapynan ózara senimniń joǵary ekenin jáne mınıstrlikter arasyndaǵy ózara is-qımyldy odan ári nyǵaıtýǵa degen yntanv kórsetedi.
Kezdesý barysynda Aıdarbek Saparov qos eldiń strategııalyq seriktestigin alǵa tarta otyryp, agrarlyq sektor ekijaqty yntymaqtastyq baǵytynda mańyzdy oryn alatynyn atap ótti. Sońǵy bes jylda agroónerkásiptik keshen ónimderiniń ózara taýar aınalymy turaqty ósim kórsetip, 2021 jylǵy 2,9 mlrd AQSh dollarynan 2025 jyldyń qorytyndysy boıynsha 4,4 mlrd AQSh dollaryna jetti. Al bıylǵy jyldyń qańtar aıynda saýda kólemi 6,6%-ǵa artty.
-Qazaqstandyq aýyl sharýashylyǵy ónimderiniń eksporty qyzý qarqynmen damyp keledi. Byltyrǵy jyldyń qorytyndysy boıynsha ósim 15,7%-dy qurady. Bıyl qańtar aıynda da eksport kólemi 17,8%-ǵa artty. Bul bizdiń áriptestigimizdiń tıimdiliginiń aıqyn kórsetkishi. Taǵy bir atap óterligi taraptar jumysynyń ózara úılesimdiliginiń jáne buǵan deıin engizilgen shekteýlerdi kezeń-kezeńimen alyp tastaýdyń nátıjesinde aıtarlyqtaı joǵary kórsetkishterge qol jetkizildi.
Qazirgi ýaqytta qazaqstandyq-reseılik yqpaldastyq jónindegi is-sharalar jospary belsendi túrde iske asyrylyp keledi. Osy rette ǵylymı-tehnıkalyq damý jáne syrtqy saýda baǵyttary boıynsha birqatar qujatqa qol qoıyldy. Elektrondyq fıtosanıtarııalyq ilespe qujattarmen almasý baǵytynda aqparattyq júıeler tolyq biriktirilip, Rosselhoznadzordyń «Merkýrıı» júıesimen ózara is-qımyl jolǵa qoıyldy, - dedi mınıstr.
Oksana Lýt ta ótken jyly taýar aınalymynyń óskenin atap ótip, bıylǵy qańtar–aqpan aılarynda da bul úrdis saqtalǵanyn atap ótti.
-Osyǵan baılanysty ózara saýda salasyn odan ári damytýdy, onyń ishinde qazaqstandyq ónim eksportyn Reseı naryǵyna keńeıtý arqyly arttyrý jolyn qarastyrýymyz qajet. Bul qosymsha pysyqtaýdy qajet etedi. Ekijaqty ózara is-qımyldyń keń aýqymdy máselelerin, sonyń ishinde epızootııalyq jaǵdaıdy, mal sharýashylyǵy jáne jemshóp ónimderin jetkizý men tranzıtke qoıylatyn shekteýlerdi, veterınarııalyq baqylaý, vaktsınalar jetkizý, kıik popýlıatsııasyn monıtorıngileý máselelerin qarastyrýdy usynamyn, — dedi O. Lýt.
Qazaqstan Reseıdiń eń iri saýda seriktesteriniń bestigine kirgeni týraly jazdyq.
