Qazaqstan men Reseıdiń saýda-sattyǵynda tepe-teńdik joq - sarapshy
ASTANA. QazAqparat - QR Tuńǵysh Prezıdentiniń qory janyndaǵy álemdik ekonomıka men saıasat ınstıtýtynyń mamany Asqar Nurshanyń aıtýynsha, Reseı qazaqstandyq taýarlar úshin óz naryǵyn keńirek ashýy tıis. Onsyz birjaqty saýda-sattyq saıasaty jalǵasa beredi, dep habarlaıdy QazAqparat tilshisi.
«Búginde Qazaqstan men Eýropa arasyndaǵy saýda-sattyq Reseımen aradaǵy alys-beristen eki ese artyq bolyp tur. Osy bir máseleni umytpaý qajet. Sondyqtan «Qazaqstannyń №1 áriptesi kim?» degende kórshi Reseıdi aıtsaq ta, Eýropanyń úlesi basym ekenin umytpaýymyz qajet", - dedi Asqar Nursha. Máselen, onyń pikirinshe, Eýropa elderin bir memleket retinde qarastyratyn bolsaq, Qazaqstan eksportynyń 50 protsenti Eýropaǵa tıesili. Al Qazaqstanǵa keletin eýropalyq taýarlardyń úles salmaǵy da 57 protsentti qurap otyr.
"Demek, bizdiń Eýropamen aradaǵy saýda-sattyǵymyz teń, ári kórshi Reseı men Qytaıdy birge qosqandaǵy alys-beristen artyq. Qazirgi kezde Qazaqstannyń eksportynda Reseıdiń úlesi 10-aq protsentti quraıdy. Qytaı da solaı. Sosyn eki jaqty saýda-sattyqta tepe-teńdik joq. Máselen, Reseı bizden satyp alǵan taýarlarmen salystyrǵanda, óz ónimderin 6 mlrd dollarǵa artyq satyp otyr. Mine, osyndaı máseleler ózara ıntegratsııaǵa da keri áserin tıgizedi. Menińshe, Reseı qazaqstandyq taýarlar úshin óz naryǵyn keńirek ashyp, qazirgi tepe-teńsizdikti qalpyna keltirse, eýrazııalyq ıntegratsııa kúsheıe túsedi. Saýda-sattyq - bul ıntegratsııanyń qozǵaýshy kúshi. Ol birjaqty bolmaýy shart. Barlyǵyna birdeı tıimdi bolǵan jón», - dedi Asqar Nursha búgin Astanada bastalǵan «Qazaqstan - Reseı» sarapshylar forýmynda.
Aıta keteıik , Qazaqstan - Reseı sarapshylar forýmy Qazaqstannyń xalyqaralyq qatynastar keńesi, "Valdaı" pikirtalas klýby men "Parasat" júıeli zertteýler ınstıtýtynyń bastamasymen ótip otyr. Sessııa kezinde sóz alǵan qazaq-qytaı yntymaqtastyǵy jónindegi "China Center" xalyqaralyq ortalyǵynyń bas dırektory Ádil Káýkenov Uly Jibek joly jobasyna qatysty birqatar mańyzdy máselelerdi kóterdi.
