Qazaqstan men Reseıdiń monopolııaǵa qarsy vedomstvolary uıaly baılanys operatorlarynyń jumysyn birlesip tekseredi
ASTANA. Maýsymnyń 2-si. QazAqparat /Asqar Bımendın/ - Qazaqstannyń Monopolııaǵa qarsy agenttigi otandyq jáne reseılik uıaly baılanys operatorlary jol bergen ulttyq zańnamany buzý belgilerin anyqtady, delingen vedomstvo taratqan baspasóz baıanynda.
Aǵymdaǵy jyldyń naýryz aıynda monopolııaǵa qarsy agenttiktiń keńes ótkizip, onda uıaly baılanys operatorlaryna 2010 jyldyń sáýir aıynyń 1-inen bastap baǵany tómendetý jáne halyqaralyq roýmıng qyzmetin kórsetýge sekýndtyq tarıfke aýysý týraly usynys jasalǵanyn QazAqparat budan buryn habarlaǵan edi. Biraq operatorlar usynysty qabyldamaı, ózge elderdegi roýmıng-seriktesterimen arada qajetti kelisimniń joqtyǵyn alǵa tartty.
RF Federaldyq monopolııaǵa qarsy qyzmetiniń osyndaı saýalyna «úlken úshtiktiń» reseılik operatorlary da dál osyndaı «ýáj» aıtyp otyr. Sondyqtan da, seısenbi, maýsymnyń 1-i kúni Qazaqstan men Reseıdiń monopolııaǵa qarsy agenttikteri , «Qazaqtelekom» AQ «GSM Qazahstan» JShS, «KaR-Tel» JShS, «Mobaıl Telekom-Servıs» JShS (Qazaqstan Respýblıkasy), «MTS» AAQ, «VympelKom» AAQ, «MegaFon» AAQ ( Reseı Federatsııa) kompanııalarynyń básekelestikke qarsy kelisim ornatý jáne ózara kelisip áreket etý belgileri boıynsha birlesip tekserý júrgizýdi bastaǵandaryn málim etti.
Oǵan qosa, qazaqstandyq monopolııaǵa qarsy agenttik qazirgi tańda halyqaralyq roýmıng qyzmetterin qosý aqysynyń bastapqy somasyn belgileýde óziniń naryqtaǵy basymdyqty jaǵdaıyn asyra paıdalanyp otyrǵan «Qazaqtelekom» AQ «GSM Qazahstan» JShS, «KaR-Tel» JShS, «Mobaıl Telekom-Servıs» JShS kompanııalarynyń ústinen tekserý júrgizýde.
