Qazaqstan men Reseıdiń qorǵanys mınıstrleri áskerı-tehnıkalyq yntymaqtastyq salasyndaǵy jańa kelisimge qol qoıdy
Mınıstrliktiń baspasóz qyzmetiniń habarlaýynsha, kelissóz barysynda taraptar jaqyn aradaǵy bolashaqta ózara is-qımyl máselelerin, sondaı-aq, ekijaqty áskerı jáne áskerı-tehnıkalyq yntymaqtastyqtyń oń serpinin atap ótip, qorǵanys salasyndaǵy birqatar máselelerdi talqylady.
Reseı Federatsııasymen áskerı-tehnıkalyq yntymaqtastyq sheńberinde Qazaqstan men Reseı prezıdentteriniń ýaǵdalastyǵy negizinde bizdiń tarapqa 5 dana S-300 zenıttik zymyran kesheni berildi. Odan basqa, Reseı tarapy osy keshenderge 170-ten asa zenıttik zymyrandardy tapsyrý jónindegi memleketishilik protsedýrany resimdeýdi aıaqtaýda.
UQShU sheńberinde múshe memleketter arasynda áskerı maqsattaǵy ónimdi tranzıtteý jáne áskerı tasymaldaýlardy júzege asyrý tártibin jeńildetýge múmkindik beretin memleketaralyq kelisim jasasý boıynsha másele qaraldy.
Mundaı kelissózderdiń mańyzdy nátıjeleri retinde QR men RF qorǵanys vedomstvolarynyń torapty birlesip paıdalanýǵa kóshýdi, qazaqstandyq mamandardy oqytý jáne budan buryn reseı tarapymen paıdalanylǵan jer teliminiń shekaralaryn qysqartýdy kózdeıtin zymyrannyń shabýyly týraly aldyn alý júıesinde Balqash torabyn tapsyrý jáne paıdalanýdyń jańa sharttaryn aıqyndaý týraly kelisimniń bekitilýin oıdaǵydaı dep atap ótýge bolady.
«Áskerı-tehnıkalyq yntymaqtastyq salasynda bizdiń ári qaraıǵy jumysymyzdyń jańa sheńberin, jańa shekarasyn ashatyn kelisimge qol qoıdyq», - dedi Imanǵalı Tasmaǵambetov Reseı qorǵanys vedomstvosynyń basshysymen kelissózden keıin.
Ótken jyldan bastap áskerı-tehnıkalyq yntymaqtastyq týraly qazaqstandyq-reseılik shart qoldanysqa engizilgenin aıta ketken jón. Atalǵan sharttyń tetigi Qarýly Kúshterimizge reseılik armııasyna sekildi quny men jınaqtalýy boıynsha birqatar zamanaýı qarý-jaraqtyń jetkizilýine múmkindik berdi. Bul Sý-30SM joıǵyshtary, Mı-171Sh pen Mı-35 áskerı-kóliktik jáne jaýyngerlik tikushaqtary, radıotehnıkalyq barlaý jáne monıtorıngileý quraldary, sondaı-aq, ózge de qarý-jaraq.
