Qazaqstan men Reseıdiń energııa júıeleriniń parallel jumysyn qamtamasyz etetin sharttardyń tolyq toptamasyna qol qoıyldy - «KEGOC» AQ
STANA. Sáýirdiń 30-y. QazAqparat - Qazaqstan men Reseıdiń energııa júıeleriniń parallel jumysyn qamtamasyz etetin sharttardyń tolyq toptamasyna qol qoıyldy,
dep habarlady «KEGOC» kompanııasynyń baspasóz qyzmetinen.
Qazaqstan Respýblıkasy men Reseı Federatsııasy memleket basshylarynyń tapsyrmalaryn oryndaý maqsatynda jáne 2009 jylǵy qarashanyń 20-synda jasalǵan Qazaqstan Respýblıkasy men Reseı Federatsııasynyń Birtutas energııa júıeleriniń parallel jumysyn qamtamasyz etý sharalary týraly úkimetaralyq kelisimge sáıkes,sáýirdiń 30-y kúni tómendegideı sharttarǵa qol qoıyldy:
«KEGOC» AQ men «FSK» AAQ, «SO EES» AAQ arasynda Qazaqstan Respýblıkasy men Reseı Federatsııasy elektr energetıkasy júıeleriniń parallel jumysy týraly;
«KEGOC» AQ men «FSK» AAQ arasynda Qazaqstan Respýblıkasynyń elektr jelileri arqyly elektr qýatyn jetkizý (aýystyrý) qyzmetin kórsetý;
«KEGOC» AQ men «INTER RAO EES» AAQ arasynda Reseı Federatsııasy men Qazaqstan Respýblıkasynyń shekaralary arqyly elektr qýatyn jetkizý kezinde týyndaıtyn saǵattyq aýytqýlar kóleminiń ornyn toltyrý maqsatynda elektr energııasyn satyp alý jáne satý.
Sondaı-aq 2009 jyldyń aıaǵynda «KEGOC» AQ men «INTER RAO EES» AAQ «Qazaqstan Respýblıkasy men Reseı Federatsııasynyń shekaralary arqyly ótetin elektr qýatynyń mólsherin saǵattyq esepke alý tártibi, kún saıynǵy almasymdy uıymdastyrý men saǵattyq esepke alý málimetterin kelisý týraly» kelisim jasaǵan bolatyn.
- Eki memlekettiń elektr energetıkasy salasyndaǵy dástúrli seriktestik qarym-qatynasy sapalyq jaǵynan jańa deńgeıge kóterilip otyr. Qazaqstan men Reseı basshylarynyń Birtutas kedendik keńistikti qurý baǵytyndaǵy saıasaty sheńberinde búgingi jasalǵan kelisimder osy energııa júıeleriniń parallel jumysynyń ekonomıkalyq jáne tehnologııalyq artyqshylyqtaryn eki memleket tutynýshylarynyń ıgiligi úshin barynsha tıimdi paıdalanýǵa múmkindik beredi, dep atap kórsetti «KEGOC» AQ Prezıdenti Almasadam Sátqalıev.
Eki memlekettiń birtutas energııa júıeleriniń kórsetetin ózara qyzmetteri kommertsııalyq negizge kóshedi. Reseı jaǵy elektr energııasyn qazaqstandyq jeliler arqyly jetkizý/tasymaldaýdy aqyly negizde júzege asyratyn bolady. KEGOC AQ óz kezeginde, Qazaqstan atalmysh júıeniń júıelik operatory retinde normatıvtik jıilikti qadaǵalaý qyzmetine aqy tóleı bastaıdy. Osy ýaqytqa deıin qýatty (jıilikti) retteý elektr energııasynyń tranzıtine qaıtarym retinde júzege asyrylyp kelgen bolatyn. Sharttyq mindettemelerdiń bolýy dıspetcherlik qyzmet jaýapkershiligin arttyrýǵa jáne eki memleket shekarasy arqyly ótetin elektr energııasy aǵynynyń saldosyn qadaǵalaýǵa yqpal etpek.
Energııa júıeleriniń birlesken jumysy boıynsha jasalǵan kelisimder toptamasy ınfraqurylymdyq sıpatqa ıe jáne Qazaqstan tarapynan da, Reseı tarapynan da elektr energııasy naryǵyna enýdiń quqyqtyq negizin jasaıdy. Qarym-qatynastardyń teńdestirilgen deńgeıi uzaq ýaqyt boıy júrgizilgen kelissózder men taraptardyń teń quqyqtyq jáne ózara tıimdilik prıntsıpterine negizdelgen ázirlengen qujattar boıynsha kelisimge kelý nátıjesinde qamtamasyz etildi. Reseı Birtutas energııa júıe Qazaqstannyń Birtutas energııa júıesimen 2000 jylǵy maýsymnyń 15-inen parallel rejimde jumys istep keledi.
