Qazaqstan men Reseıdiń energetıka mınıstrleri kezdesti

MÁSKEÝ. QazAqparat – Máskeýde Qazaqstan Respýblıkasynyń Energetıka mınıstri Maǵzum Myrzaǵalıev Reseı Federatsııasynyń Energetıka mınıstri Nıkolaı Shýlgınovpen kezdesti. Bul týraly QazAqparat mınıstrliktiń baspasóz qyzmetine silteme jasap habarlaıdy.

Kezdesý barysynda energetıkalyq vedomstvolardyń basshylary Qazaqstan men Reseıdiń gaz, munaı ónerkásibi jáne elektr energetıkasy salalaryndaǵy ekijaqty yntymaqtastyǵynyń keń aýqymdy máselelerin talqylady.

Qazirgi ýaqytta «QazTransGaz» UK» AQ men «Gazprom» JAQ arasynda osyǵan deıin qurylǵan birlesken jumys tobynyń aıasynda Qazaqstannyń soltústik jáne shyǵys óńirlerin gazdandyrý, onyń ishinde qajetti qosymsha gaz kólemi máseleleri talqylanýda.

Aldaǵy ýaqytta taraptar jobany baǵalaý, gazdy tutyný qurylymy men kólemderin, sondaı-aq gaz qubyrlaryn tartý quny men baǵyttaryn anyqtaýy tıis.

Elektr energetıkasy máselelerinde vedomstvolardyń basshylary Qazaqstannyń birtutas elektr energetıkalyq júıesi qýatynyń saldo-aǵyndarynyń josparly mánderden aýytqýlaryna baılanysty ahýaldy retteý jónindegi birlesken jumys toby sheńberinde jumysty jalǵastyrý jóninde kelisti.

Sondaı-aq, Qazaqstan Respýblıkasynyń Premer-mınıstri Asqar Mamınniń Reseı Federatsııasy Úkimetiniń Tóraǵasy Mıhaıl Mıshýstınmen kelissózderi barysynda Qazaqstan men Reseı energetıka mınıstrleri eki eldiń energetıkalyq vedomstvolary arasynda «Eýropa-Batys Qytaı» halyqaralyq kólik baǵytynda otyn retinde tabıǵı gaz naryǵyn damytý salasyndaǵy ózara túsinistik týraly Memorandýmǵa qol qoıdy.

Sonymen qatar joba parnıktik gazdar shyǵaryndylaryn dáıekti túrde azaıtý jáne 2060 jylǵa qaraı kómirtegi beıtaraptyǵyna qol jetkizý doktrınasy negizinde Kólik sektoryn dekarbonızatsııalaý boıynsha Parıj jáne Glazgo sammıtteriniń maqsattary men mindetterin qoldaıdy.